«Báıterek development» AQ-nyń baspasóz qyzmetiniń málimetinshe, qaryz «Nurly jer» turǵyn úı qurylys baǵdarlamasyna sáıkes 4 jyl merzimge bólinedi.
«Jýyrda «Báıterek development» aksıonerlik qoǵamy men «Elorda qurylys kompanııasy» jaýapkershiligi shekteýli seriktestik jáne Astana qalasy ákimdiginiń arasynda QR Ulttyq qorynan qarjy bólý týraly kelisimge qol qoıyldy. Eki jyldyń ishinde úleskerlerdiń máselesine 40 mlrd teńge bólinetin bolady», - dep habarlady «Báıterek development» AQ basqarma tóraǵasynyń orynbasary Altaı Kýzdıbaev.
Memlekettik qarjy qaıtarym negizinde beriledi. Aıaqtalmaǵan qurylysty bitirýge bólinetin qarjyny nesıe negizinde Astana qalasynyń mekemearalyq komıssııasy qalyptastyrady.
Aıta keteıik, «Báıterek development»AQ - «Báıterek» holdınginiń enshiles uıymy - nesıelik turǵyn úı qurylysyn qarjylandyrý úshin jergilikti atqarýshy organdardyń oblıgasııalaryn satyp alý boıynsha «Nurly jer» turǵyn úı qurylys baǵdarlamasynyń qarjy operatory bolyp tabylady.
