О́tken senbide oblys ákimi Amandyq Batalov Kegen jáne Raıymbek aýdandaryna jumys saparymen baryp, óńir turǵyndaryna eki aýdannyń jańadan taǵaıyndalǵan ákimderin tanystyrdy. Tıisinshe, jańadan ashylǵan Raıymbek aýdanynyń ákimi bolyp Jolan Omarov taǵaıyndalsa, Kegen aýdanyn basqarý mindeti Talǵat Baedilovke júkteldi. Sondaı-aq oblys basshysy Narynqol aýylyndaǵy ákimshilik basqarý ortalyǵy men qyzmet kórsetý oryndary ornalasatyn ǵımarattardaǵy jóndeý jumystarymen tanysyp, birqatar eskertpeler aıtty. Al aýdan ákiminiń apparaty ýaqytsha ǵımaratqa qonystanyp, jumysyn bastady. Osylaısha oblystaǵy on jetinshi aýdannyń ortalyǵynda tirshilik kórigi qyzdy.
– «Temirdi qyzǵan kezinde soq» degendeı, Prezıdent Jarlyǵy shyqqan kúnnen bergi sanaýly ýaqyt ishinde aýdan ortalyǵyn kóshirýge qatysty qyrýar jumys atqaryldy. Eń bastysy shekaranyń shebine aýdan ortalyǵy qonystandy. Jas, isker ákim taǵaıyndadyq. Endi óńirdiń tynysy ashylyp, aýyl kórkeıýi kerek. Oblys ákimdigi tarapynan barlyq kómek, qoldaý jasalady. Jańa aýdan aýylǵa jastardyń qaıtyp kelýine uıytqy bolýy tıis. Endi Narynqolda bıznes damyp, jańa jumys oryndary ashylady, – dedi aýdan turǵyndarymen kezdesken oblys ákimi Amandyq Batalov.
Shekaralyq aýdandy damytýǵa qatysty jospardy júzege asyrý óńirdegi aýyl sharýashylyǵynyń órisin keńeıtedi. Negizinen mal ósirip, kartop egýmen dańqy shyqqan Narynqol aımaǵynyń eńbekkerleri úshin jarqyn bolashaq jaqyn. Ásirese kartop sharýashylyǵyn demep, qoldaý jasaý Narynqol topyraǵynda óngen ónimniń oblys, qala berdi elimizdiń suranysyn óteıtindeı múmkindikke jol ashady. Bıylǵy jyly kartop egistiginiń kólemin arttyryp, 110 myń gektarǵa jetkizý mindeti tur.
Jalpy, jańadan ashylǵan aýdanda jasalatyn jumys aýqymy úlken. Narynqoldaǵy ǵımarattar men nysandardyń barlyǵy derlik kúrdeli jóndeýdi qajet etedi. Aýyldyń joldary da syn kótermeıdi. Jastar men turǵyndardyń týǵan aýylyna oralýyna da jaǵdaı jasaý kerek. Ol úshin baspana men basqa da mádenı-sport nysandarynyń esigi ashyq bolýy tıis. Munsyz shekaradaǵy aýyldyń shamy samaladaı jarqyramaıtyny aıan. El keleshekten úmitti. Narynqoldyń naǵyz dáýirleý kezeńi týady dep senedi.
Aıtpaqshy, osy saparynda Amandyq Batalov Narynqol aýylynda jańadan 50 úı salynatynyn aıtty. Baspana qyzmetkerlerge arnap turǵyzylady. Bul – aýdanǵa jastardy, bilikti mamandardy tartýdyń biregeı joly.
Qalmahanbet MUQAMETQALI,
«Egemen Qazaqstan»
Almaty oblysy
