«Ulystyń uly kúni uıymdastyrylǵan ashamaıǵa mingizý rásimi bastalmas buryn Qazaqstan, Jalshı, Shilikti aýyldaryndaǵy úılerdi aralap, jetpisten astam otbasyna, múmkindigi shekteýli jandarǵa, qarııalarǵa naýryzkóje tarattyq. Osyndaı tamasha dástúrdi nasıhattaǵan sharaǵa Zaısan qalasynan, Shilikti aýyldyq okrýginen qonaqtar kóp jınaldy. Oıýlanǵan quraq-kórpe jabylǵan taıǵa basyna úkili taqııa, ústine ulttyq kıim kıgen 7 jastaǵy Mıras Zamanbek esimdi baldyrǵandy mingizip, naǵashy atasy Baqytbek ortaǵa alyp shyqty. Aldymen balanyń qadamy sátti bolsyn degen tilekpen úlkender aq batasyn berdi. Odan keıin atasy nemeresiniń qolyna tizgindi ustatyp, aqjaýlyqty analar aqjarma tilekterin aıtyp, shashý shashyldy. Naǵashy atasy jıeni mingen taıdy jetektep, arly-berli júrip, jınalǵan qaýymdy aınalyp ótti. Budan keıin apasy nemeresine syılyǵyn tapsyryp, jınalǵandar kórimdigin berip, syı-sııapattaryn jasady. Bul rásimdi ótkizýdegi maqsatymyz – eń áýeli búginde umytyla bastaǵan dástúrimizdi dáripteý bolsa, ekinshiden, qazir bar bolǵany 11 tútini ǵana qalǵan Kákentaldy aýyly turǵyndarynyń kóńilin kóterip, bir serpiltkimiz keldi», deıdi osy ıgi sharany uıymdastyrýǵa uıytqy bolǵan, Shilikti aýylyndaǵy ájeler alqasynyń tóraıymy Qamarııa Ábýsaǵıtova.
Jalpy jylqy malynyń qazaq úshin orny qashanda bólek. Atqa minseń eńseń kóteriledi, arýaqtanasyń, aıbarlanasyń. Qyzyl qasqa taıyna qarǵyp mingen Mıras ta aý toltyryp at minip, aýyz toltyryp sóz aıtqan burynǵy babalaryndaı baraqat sezimdi bastan keshti, qýandy, shattandy, qaırattandy deıdi balanyń ákesi Arman. Ashamaıǵa mingizý saltanaty aıaqtalǵan soń aýyl turǵyndary arasynda arqan tartys, jaıaý jarys oıyndary uıymdastyrylyp, «Qara jorǵa» bıinen saıys ótip, balalar taı jarystyrdy.
Azamat QASYM,
«Egemen Qazaqstan»
Shyǵys Qazaqstan oblysy,
Zaısan aýdany,
Kákentaldy aýyly
