– Bul keremetti jasaǵan kim eken? – dep jatyrmyz tańǵalyp.
– Qazynagúl degen apamyz bar, bul sáýkele sol kisiniń qolynan shyqqan keremet, – dedi ortalyq dırektory Nursulý Erkebaıqyzy.
Nursulýdyń aıtýynsha, Qazynagúl Qylyshbaıqyzy Qoıandy aýyldyq klýbynyń mádenıet qyzmetkeri. Aýyldaǵy «Káýsar» ájeler ansamblin basqarady. Osy ansambldiń músheleri Násıpa Altaeva, Sholpan Tejekova, Gúlbaǵıran Qaıyrbaı, Násip Malybaı, Sulýshash Qurmanova 10 jylǵa jýyq ýaqyttan beri án salyp, oıý-órnek oıyp, jurtshylyqty qolónerlerimen qyzyqtyryp keledi. Byltyr káýsarlyqtardyń uıymdastyrýymen «Altyn oımaq» qolóner kórmesi uıymdastyrylypty. Kórmeniń maqsaty – halqymyzdyń ulttyq naqyshtaǵy buıymdaryn zamanǵa saı jańa úlgide kórsetý. Osy ortalyqtaǵy kórmede apa-ájeler jasaǵan qolóner buıymdary jınaqtalypty. Tipti ájeler ártúrli kımeshekter úlgisin jasap, «Kımeshekter sherýin» de ótkizipti.
Mysaly, Gúlbaǵıran apaı kórpeshe, jastyqshalardy jasap, toqyma toqıdy, Qazynagúl apaı fetrdan oıý quraıdy, osy matadan qyzdarǵa arnalǵan ulttyq naqyshtaǵy zamanaýı qol sómkelerin, qamzol, bas kıim tigedi. Al kórmege qoıylǵan osy buıymdardyń ishinde erekshe kózge túsetini qazaq qyzdarynyń sulýlyǵyn pash etetin bas kıimderiniń biri – sáýkele.
Qazynagúldiń sáýkeleni bıik, kózge túserlikteı etip jarqyratyp, áshekeılep jasaýdaǵy maqsaty qyzdarǵa ózge jurttyń emes, ózimizdiń ulttyq bas kıimdi kıip uzatylý kerektigin eske salý edi. Sáýkeleni uzatylǵan qyzdar jáne onyń janyna erip júretin qurbylary da kıgen. Negizgi bólikteri – táj, tóbe, qulaqbaý jáne artqy boıy. Mańdaı tusyna jibek shashaq taǵady. Qyzdarymyzǵa sáýkeleniń ultymyzdyń mádenıeti men óneriniń ozyq úlgisi, óner týyndysy retinde baǵalanatyn qasterli dúnıe ekenin uqtyrýdy oılaǵan. Qazynagúl sáýkeleni 3 aı boıy tigip, jasap shyǵypty.
– Jalpy, «Atamura» ortalyǵy 1993 jyly 16 jeltoqsanda ashyldy. Maqsaty – umytylyp bara jatqan salt-dástúrler, tarıh pen mádenıet, tilimizdi, ulttyq ónerimizdi nasıhattaý. Mysaly, «Ǵasyrlar saryny», «Jigit sultany», «Qazaqtyń kelinderi-aı», «Kıeli kımeshek», «Áýjar», «Tusaýkeser», «Selt etkizer», «Aýyldaǵy toı» rýhanı-mádenı sharalaryn ótkizdik. Ortalyqta «Aqsaqaldar ádil-qazylyǵy» qoǵamdyq birlestigi, «Juldyz» vokaldyq úıirmesi, «Jas tolqyn» aqyndar mektebi, «Shabyt» ádebı birlestigi, «Qyran», «Gúlzar», «Atamura» folklorlyq-etnografııalyq ult-aspaptar ansambli bar. Ortalyqqa qalanyń 16 aýyldyq klýby qaraıdy. Barlyq klýbtarda kórkemónerpazdar ujymdary jumys isteıdi. Ortalyqta, jazýshy Rollan Seısenbaev, «Shal» fılminde basty róldi somdaǵan Erbolat Toǵuzaqov boldy. Úndistan men Fransııa elshilerin de qarsy aldyq, – deıdi Nursulý Tóleýbaeva.
Sonymen birge ortalyqta Qýat Ábýseıitov, Qalmuqan Isabaı, Farıza Ońǵarsynova, Roza Baǵlanova, Ermek Serkebaev sekildi belgili tulǵalar bolypty.
Farıda BYQAI,
«Egemen Qazaqstan»
Pavlodar oblysy,
Ekibastuz qalasy
Sýretti túsirgen Pana YDYRYSOVA
