Geologııa ǵylymynyń teorııalyq jáne praktıkalyq máselelerin sheshýdegi kórnekti jetistikteri, metallogenııa dep atalatyn jańa ǵylymnyń negizi men damýyn, Qazaqstannyń mıneraldy shıkizat qoryn barlaý, qurý jáne keshendi paıdalaný boıynsha eren eńbekteri, Keńes Odaǵy kezinde respýblıka ǵylymyn uıymdastyrý men damytý – akademık, Qazaqstan Ǵylym akademııasynyń uıymdastyrýshysy jáne tuńǵysh prezıdenti Qanysh Sátbaevtyń atymen tyǵyz baılanysty ekeni ras.
Osy tusta Qazaqstan Prezıdenti Nursultan Nazarbaev Qanysh Sátbaev tulǵasy týraly paıymdaı kele «...Meniń oıymsha, Qanysh Imantaıuly keshegi ótken Keńester Odaǵynyń ǵana uly adamdarynyń biri emes, ol ótip bara jatqan ǵasyrdyń uly perzenti. Tap osyndaı zańǵarǵa Qazaqstannan da, qazaqtardyń arasynan da eshbir adam kóterilgen emes. Men Qanysh Sátbaevty tek qazaq ultynyń ǵana emes, jalpy burynǵy Keńester Odaǵynyń uly adamdarynyń qataryna qosamyn. Men ony ádil tórelik jasap, durys sheshimder shyǵaratyn shynaıy tóreshiler syndy ýaqyt pen tarıhtyń baǵasy dep baǵalar edim», deıdi.
Keleli májilisti Elbasy kitaphanasy dırektorynyń orynbasary Ámirhan Rahymjanov ashyp «Búginde Sátbaev murasyna qatysty metallogenııa, mıneralogııa, geohımııa, paıdaly qazbalar, stratıgrafııa, tektonıka, geografııa, ekonomıka syndy túrli ǵylym salalarynda jazylǵan 800-ge tarta irgeli eńbekter bar. Byltyr Prezıdent N.Nazarbaev qoǵamdyq sanany jańǵyrtý baǵyttarynyń biri retinde bilim salasynyń belgilengendigin atap ótken bolatyn. Ultymyzdyń betke ustar uly perzenti Q.Sátbaevtyń ǵylym damýyna qosqan úlesi men eńbek joly keıingi býyn úshin sana jańǵyrýynyń negizgi baǵyty bolyp qala bermek», dedi.
Konferensııada Q.Sátbaevtyń Qazaqstan ǵylymynyń damýyna sińirgen orasan zor eńbegi haqynda sheteldik jáne otandyq ǵalymdar kólemdi baıandamalar jasady.
Tájikstan Respýblıkasynyń Qazaqstandaǵy Tótenshe jáne ókiletti elshisi Nazırmad Alızod óz sózinde Qanysh Sátbaev qazaq halqyna ǵana emes, búkil túrki halyqtaryna ortaq tulǵa desek qatelespeımiz. Zamanynda onyń Tájik KSR Ǵylym akademııasynyń ashylýyn uıymdastyrýǵa tikeleı atsalysqanyn búginde maqtanyshpen aıtamyz. Akademık Q.Sátbaevty máńgi este saqtaý úshin mundaı is-sharalar eki elde de jıi ótip turady. Onyń ónegeli jolyn bolashaq urpaqqa úlgi etý bizdiń paryzymyz», dedi.
Sondaı-aq geologııa jáne jer qoınaýyn paıdalaný komıtetiniń tóraǵasy Aqbatyr Nadyrbaev, «Qazaqmys» korporasııasynyń bas dırektory Baqtııar Qryqpyshev, K.Aqyshev atyndaǵy arheologııa ǵylymı zertteý ınstıtýtynyń dırektory Maral Habdýlına jáne akademıktiń tikeleı urpaǵy, nemeresi Álıma Jarmaǵambetova baıandama jasady. Álıma Qanekeıqyzy búginde ata jolymen ǵylym salasynda óziniń dara esimin qalyptastyrǵan úlken ǵalym. Búginde «D.Sokolskıı atyndaǵy organıkalyq katalız jáne elektrohımııa ınstıtýty» enshiles memlekettik kásiporny dırektorynyń orynbasary qyzmetin atqaryp otyrǵan tektiniń tuıaǵy da óz sózin atasynyń HH ǵasyrdaǵy Qazaqstannyń damýyna zor úlesin qosqan qoǵam jáne memleket qaıratkeri ekenin, bir sózben aıtqanda naǵyz kóshbasshy tulǵa ekeninen bastady. «Ol oıyndaǵysyn júzege asyrý arqyly birneshe ǵalymdar býynyna asyqpaı ári jemisti jumys isteýge múmkindik berdi. Aınalasyna batyl, ymyrasyz, ózi sııaqty qaısar pikirlesterdi jınaı bildi. Otandyq ǵylymnyń abyroıyn asqaqtatqan zamandastary Ǵylym akademııasynyń alǵashqy músheleri osyǵan dálel», deıdi Á.Jarmaǵambetova.
Jalpy, Qanysh taǵylymy búginde onyń ǵylymı bastamalary men muralarynyń jan-jaqty nasıhattalýymen qundy. Ǵalymnyń ómiri men eńbek jolyn ónege etý arqyly óskeleń urpaqqa patrıottyq jáne adamgershilik tárbıe berý máseleleri jyl saıyn jańa býynnyń jadynda jańǵyryp keledi.
Mıras ASAN,
«Egemen Qazaqstan»
