Osyǵan baılanysty QHR úkimeti Amerıkanyń Dúnıejúzilik Saýda Uıymynyń talaptaryn buzyp otyrǵanyn jarııalady, dep jazady Qytaıdyń bas gazeti «Jenmın jıbao». Málimdemede «AQSh úkimetiniń bul sharasy QHR-dyń zańdy quqyqtary men múddelerine qol suǵý bolyp tabylyp, Qytaıdyń damýyna qater tóndiredi» dep jazylǵanyn habarlady gazet.
О́z tarapynan Qytaı da AQSh-tyń óz naryǵyna kiretin 106 túrli taýaryna 25 paıyz qosymsha salyq engizetinin málimdedi. Bul taýarlardyń qataryna soıa maıy, avtomobılder, hımııa ónerkásibiniń ónimderi jáne t.b. kiredi. Biraq bul sharanyń engizilýi amerıkalyqtarǵa baılanysty ekenin de Qytaıdyń Memkeńesi jarııalap, eger olar ózderiniń joǵaryda málimdegen sharalaryn engizetin bolsa, qarymta retinde QHR Keden komıteti de jańa tarıfterdi engizetinin eskertti.
«Jenmın jıbao» «amerıkalyqtardyń osyndaı birjaqty, negizsiz isterine Qytaıdyń bulaı jedel jaýap qaıtarýynyń ózi – Tramp ákimshiligi týǵyzyp otyrǵan saýdadaǵy osyndaı keleńsizdikterge QHR úkimeti qyraǵylyq tanytyp, oǵan birden jaýap berýge tóselip kele jatqanyn kórsetedi», dep jazdy.
Jaıshylyqta sheshimderdi uzaq tolǵanyp, ábden saralanǵan soń ǵana iske asyratyn Qytaıdyń bulaı jedel jaýap berýiniń syryn suraǵan amerıkalyq CNN agenttigine QHR Qarjy mınıstriniń orynbasary Chjý Gýanıao «ekonomıkalyq turǵydaǵy barlyq qaterlerdi saralap, bizge tıisti sharalar qabyldaýǵa týra kelip otyr» dep jaýap berdi.
Sóıtip eki eldiń arasyndaǵy «saýda soǵysy» qazir qyza tústi.
Jaqsybaı SAMRAT,
«Egemen Qazaqstan»
