Merekelik sharany uıymdastyrýshylar ismerlerge matalardy ózderiniń otbasylyq qorjyndarynan shyǵarǵan. Almatylyq kásipker Álııa Ábdibaıtova bul bastamanyń tórkini ulttyq dástúrimizden tamyr alatyndyǵyn aıtady.
– Árbir qazaqtyń shańyraǵynda, sórelerde saqtalǵan syılyqtar bolady. Ádette bular: shapandar, oramal, kezdeme matalar. Úıge kelgen qonaqty qur qol shyǵarmaý dástúri álmısaqtan kele jatqan úrdis. Dúnıe tapshy bolǵan zamanda mata syılaý ózindik valıýtalyq syı bolatyn. Bul áli kúnge deıin bar. Bizder osyndaı matalardy óz isiniń naǵyz kásipqoıyna bergen kezde qandaı dúnıe týatynyn kópshilikke kórsetip, ózindik synaq jasaýǵa sheshim qabyldadyq, – deıdi sharany uıymdastyrýshylar.
Erekshe synaqtyń nátıjesinde tamasha kıim úlgileri týyp, zamanaýı sán úlgilerinen de ádemi kóılekter tigildi. Etegi jer syzǵan jolbarys terili kóılekti AWSM brendiniń dızaınerleri jasady. Kózdiń jaýyn alǵan kók qysqa balaq pen ulttyq órnekteri bar svıtshotty BRU brendi tikti. Al Janelle úıde kıip júretin kúlgin tústi, barqyt jeńdi halatymen kórindi. Jas dızaınerdiń biri Diana Paukstyte úlesine sarǵysh jasyl tústi mata buıyrypty. AR Selection brendiniń dızaınerleri ózine senimdi bıkeshtiń beınesin sán úlgisine syıdyrǵan. Bahmali-diń gúldi koftasy men qyzǵylt tústi juqa beldemshesi de romantıkalyq bıkeshke jarasa ketti. Jınalǵandarǵa bárinen buryn Kiori brendiniń názik maıda gúldi kóılegi unady.
– Men óz kóılegimdi «kantrı» stılinde piship, jaǵa-jeńderine shilterden jelbirshek saldym. Matanyń uzyndyǵy 4 metr, sapasy óte tamasha eken. Eski mata deýge qımaısyń. Mundaı kezdememen jumys istegen maǵan ádemi áser syılady, – deıdi Kiori brendiniń avtory Gaýhar Ahmetova.
Sonymen kóne matalardan tigilgen kóılekter aýksıonda satylyp, túsken qarajat qaıyrymdylyq qorlaryna aýdaryldy. Sán áleminiń merekelik sharasyna qatysqandar DOM «Aýtızmdi jeńemiz» jobasy men «Ashyq álem» QQ tárbıelenýshileriniń ónerinen shynaıy lázzat aldy. О́mir súrýge qushtar búldirshinder bul merekege úlken daıyndyqpen kelgeni jınalǵandardy tolqytty.
Aınash ESALI,
«Egemen Qazaqstan»
ALMATY
