Memleket basshysy rásimge qatysýshylardy Qazaqstandaǵy dıplomatııalyq mıssııalarynyń bastalýymen quttyqtap, olardyń qyzmetteri memleketaralyq qarym-qatynastardy damytýǵa tyń serpin beretinine senim bildirdi.
– Sizderdiń dıplomatııalyq qyzmetterińiz elimiz úshin mazmundy ári mańyzdy oqıǵalarǵa toly kezeńde bastalǵaly tur. Qazaqstan shırek ǵasyr ishinde demokratııalyq júıesi ornyqqan, azamattyq qoǵamy kemeldengen, ekonomıkasy damyǵan memleketke aınaldy, – dedi Nursultan Nazarbaev.
Qazaqstan Prezıdenti elimizde halyqaralyq baılanystardy nyǵaıtýǵa baǵyttalǵan kópjaqty syrtqy saıasat jalǵasa beretinin atap ótti.
– Biz beıbitshilik pen qaýipsizdikti halyqaralyq quqyq negizinde nyǵaıtýdy kózdeıtin is-áreketterdi qoldaımyz. Buǵan Qazaqstannyń Birikken Ulttar Uıymy Qaýipsizdik Keńesiniń turaqty emes múshesi retinde atqaryp kele jatqan qyzmeti dálel, – dedi Memleket basshysy.
Nursultan Nazarbaev elimizdiń bitimgershilik jumystarǵa belsendi atsalysyp otyrǵanyna nazar aýdaryp, Sırııadaǵy qaqtyǵystardy retteý isinde Astana prosesiniń aıryqsha ról atqaratynyn aıtty.
Sonymen qatar, Qazaqstan Prezıdenti Eýrazııalyq ekonomıkalyq odaq, Shanhaı yntymaqtastyq uıymy, TMD jáne Ujymdyq qaýipsizdik týraly shart uıymy sııaqty halyqaralyq uıymdar aıasynda birlese is-qımyl júrgizýdiń mańyzdylyǵyn atap ótti.
Memleket basshysy elimizdiń áleýmettik-ekonomıkalyq damý nátıjelerine toqtalyp, Qazaqstanda ınvestısııa tartý úshin qalyptasqan múmkindikter jóninde aıtty.
Nursultan Nazarbaev «Jasyl» tehnologııalardy damytý jónindegi halyqaralyq ortalyqtyń, IT-startaptar tehnoparkiniń, «Astana» halyqaralyq qarjy ortalyǵynyń jumysy týraly aıtyp, dıplomattardy osy baǵytta belsendi túrde yntymaqtasýǵa shaqyrdy.
– О́zara tıimdi saýda-ekonomıkalyq yntymaqtastyqty nyǵaıtý úshin Qazaqstandaǵy zor múmkindikterdi keńinen paıdalaný qajet. Bıyl bizdiń elimizde birqatar mańyzdy halyqaralyq is-sharalar josparlanyp otyr. Atap aıtqanda, Astana ekonomıkalyq forýmy, Álemdik jáne dástúrli din kóshbasshylarynyń VI sezi jáne Dúnıejúzilik Islam ekonomıkalyq forýmy ótedi. Osy basqosýlarǵa sizderdiń elderińiz belsene qatysady dep oılaımyn, – dedi Qazaqstan Prezıdenti.
Nursultan Nazarbaev Qazaqstan men Reseı Federasııasy arasynda qalyptasqan memleketaralyq qarym-qatynastyń joǵary deńgeıde ekenin aıtyp, yntymaqtastyqty odan ári nyǵaıta túsý baǵyty eki el halqy tarapynan keń qoldaý taýyp otyrǵanyn atap ótti.
– Men Reseı Prezıdenti Vladımır Vladımırovıch Pýtınmen dostyqqa negizdelgen jeke qarym-qatynasymyzdy joǵary baǵalaımyn. Halyqtarymyzdyń ıgiligi jolynda Qazaqstan ekijaqty formatta da, halyqaralyq kún tártibi aıasynda da Reseımen baılanysty keńeıte túsýge nıetti, – dedi Qazaqstan Prezıdenti.
Rásim barysynda Memleket basshysy Nursultan Nazarbaev О́zbekstan Prezıdenti Shavkat Mırzııoevtiń Qazaqstan-О́zbekstan qarym-qatynasyn odan ári nyǵaıtýǵa zor úles qosqanyn atap ótti.
– Bizdi О́zbekstan Respýblıkasymen kópǵasyrlyq dostyq qatynastar, mádenıetimiz ben salt-dástúrimizdiń ortaqtyǵy tyǵyz baılanystyryp otyr. Qazaqstandaǵy О́zbekstan jylynyń bastalýy jáne kelesi jyly baýyrlas О́zbekstandaǵy Qazaqstan jylynyń atap ótilýi jańa kezeńge jol ashyp, yntymaqtastyǵymyzdyń barlyq salasyna tyń serpin beretin bolady, – dedi Qazaqstan Prezıdenti.
Memleket basshysy Qazaqstannyń Túrikmenstanmen kópjaqty yntymaqtastyqty odan ári nyǵaıtýǵa nıetti ekenin aıtty.
– Búginde Ortalyq Azııadaǵy baýyrlas memleketter – Qazaqstan men Túrikmenstandy tatý kórshilik qatynastar baılanystyrady. Elderimiz arasynda senimdi ári syndarly dıalog ornap, barlyq basty baǵyttar boıynsha ózara túsinistiktiń joǵary deńgeıine qol jetkizildi, – dedi Nursultan Nazarbaev.
Qazaqstan Prezıdenti Italııa Respýblıkasymen saýda-ekonomıkalyq baılanystardyń damyp kele jatqanyna erekshe toqtaldy.
– Italııa Qazaqstannyń saýda salasyndaǵy áriptesteriniń úzdik úshtigine kiredi jáne bul kórsetkish boıynsha Eýroodaq elderi arasynda birinshi oryn alyp otyr. Sondaı-aq, Italııa – elimizdiń ekonomıkasyna qarjy quıyp otyrǵan iri ınvestorlardyń biri. Qazaqstan Italııamen jan-jaqty yntymaqtastyqty, sonyń ishinde ınnovasııalar men ozyq tehnologııalar salasyndaǵy baılanystardy odan ári damytýǵa nıetti, – dedi Memleket basshysy.
Sońynda Nursultan Nazarbaev dıplomattardy taǵy da quttyqtap, ekijaqty qarym-qatynastardy nyǵaıtý jolyndaǵy qyzmetterine tabys tiledi.
