– Siz – otandyq mádenıettiń kórnekti ókilderiniń birisiz, Qazaqstannyń halyq ártisisiz. Uzaq jyldar boıy balalar men jasóspirimder teatryna basshylyq ettińiz. Osy ýaqyt ishinde mádenıetimizdiń damýyna jáne Qazaqstan qoǵamynyń rýhanı turǵydan jańǵyrýyna zor úles qostyńyz, – dedi Memleket basshysy.
Qazaqstan Prezıdenti kınoındýstrııanyń mańyzdylyǵyn aıryqsha atap ótip, onyń qazirgi mádenıet salasynda alatyn ornyna toqtaldy.
– Búginde kıno ulttyq sana-sezim men tól mádenıetimizdi beıneleıtin negizgi quraldyń birine aınaldy. Sondyqtan men sizdi otandyq kınomyzdy odan ári damytý máselelerin talqylaý úshin shaqyrdym, – dedi Elbasy.
Doshan Joljaqsynov Nursultan Nazarbaevqa Qazaqstannyń kınematografııa ónerine erekshe kóńil bólip otyrǵany úshin alǵys aıtty.
– Sizdiń jan-jaqty qoldaýyńyzdyń arqasynda qazirgi kınoındýstrııa salasy damýdyń jańa satysyna kóterildi. Qıyndyqtarǵa qaramastan, «Kóshpendiler» fılmin túsirip, halqymyzdyń tarıhyn kúlli álemge tanyttyq. Sodan keıin «Jaý júrek myń bala» men «Almas qylysh» fılmderi, sondaı-aq meniń «Birjan sal», «Qunanbaı» fılmderim jáne basqa kınotýyndylar túsirildi. Elimizdiń búkil óńirin aralap, «Qunanbaı» fılmin kórsettik. Biz kıno arqyly tarıhı oqıǵalar men qazaq halqynyń minez-qulqyn beınelep, jurtshylyq sanasyna rýhanı jańǵyrýdyń negizgi ıdeıalaryn sińirýge tyrystyq, – dedi halyq ártisi.
