Álemde korporasııalar men bıznes-qurylymdardyń áleýmettik jaýapkershiligin arttyrýǵa dástúrli túrde úlken kóńil bólinedi. Áleýmettik jaýapkershilik mádenıetin qalyptastyrýda JOO-lardyń da atqarar róli zor. Ýnıversıtetter bilim berý qyzmeti jáne ǵylymı zerttemeler túrinde qoǵamdyq ıgilikterdi quryp qana qoımaı, qoǵamdaǵy áleýmettik minez-qulyq erejesiniń qaınar kózi bolyp tabylady. Zamanaýı joǵary oqý ornynyń mindeti bilikti mamandar daıarlaýmen shektelmeıdi, búginde ol qoǵam aldyndaǵy áleýmettik jaýapkershilikpen tolyǵýy tıis.
Bul paradıgma jetekshi ýnıversıtetterdi adamzattyń asa ózekti jáne qaýyrt máselelerin sheshýdegi JOO-lardyń áleýmettik rólin nyǵaıtý úshin birigip, konsorsıým qurýǵa ıtermeledi. USRN qyzmeti zamanaýı órkenıettiń bolashaǵy úshin JOO-lardyń áleýmettik jaýapkershiligin oryndaýda múshe-ýnıversıtetterdiń tıimdi ózara árekettesý tuǵyrnamasyn qurýǵa baǵyttalǵan.
San-Paýlý ýnıversıtetinde ótken USRN arnaıy konferensııasynda aıtýly uıym músheleri qazaqstandyq jetekshi ýnıversıtetti múshelikke qabyldaý týraly sheshimdi biraýyzdan qabyldady.
Konferensııada QazUÝ-dyń BUU turaqty damý boıynsha «Akademııalyq yqpal» baǵdarlamasynyń Jahandyq haby retindegi tájirıbesi keńinen tanystyryldy. QazUÝ usynǵan joǵary oqý oryndary damýynyń jańa tuǵyrnamasy – 4.0 ýnıversıtet úlgisi uıym músheleriniń úlken qyzyǵýshylyǵyn týdyrdy. Bul modeldi júzege asyrýda qoǵamdyq sanany jańǵyrtýǵa arnalǵan «Rýhanı jańǵyrý» baǵdarlamasy basty baǵdar bolyp tabylady. Ol tórt quramdas bólikten turady: bilim berý, zertteý, ınnovasııalyq-kásipkerlik jáne rýhanı-adamgershilik.
Búgingi kúni 4.0 ýnıversıtet úlgisi negizin ınnovasııalyq-tehnologııalyq jáne rýhanı-adamgershilik tuǵyrnama úndestigi quraıtyn «Al-Farabi University smart city» jobasynda iske asyrylýda.
Arman OKTIаBR,
«Egemen Qazaqstan»
ALMATY
