Bul tezıstiń mánin mádenıet, ǵylym, bilim, ekonomıka, saıasat salasy mamandary jaqsy túsinedi. Atalǵan jıynda Memleket basshymyz qazirgi jahandyq kúrdeli kezeńde senimdi yqpaldastyqtyń mańyzyna erekshe toqtalyp, ortaq 80-ge jýyq jobany salalandyrý qajettigin, josparlanǵan san myńdaǵan jumys ornyn qunttaýdy eske salǵan. Jobalar sátimen júzege assa, ekonomıkalyq jáne ınvestısııalyq yntymaqtastyq nyǵaıatynyn aıtqan-dy. Ásirese, Qazaqstannyń О́zbekstanǵa salatyn ınvestısııasyn odan ári yntalandyra túsetini dáıektelgen. Osy oraıda qurylysy júrip jatqan «Ortalyq Azııa» halyqaralyq ónerkásip kooperasııasy ortalyǵyna erekshe úmit artatynyn da jetkizgen. Saýda-ekonomıka salasyn damytýdyń tyń múmkindikterin izdeý, taýar aınalymyn ulǵaıtý, shıkizattyq emes eksportty qoldaý sharalaryn ózektendirý máselesi de baıyptalǵan. Endi buǵan birlesken Iskerlik keńes pen «UzKazTrade» saýda kompanııasy atsalysatynyna senim bildirgen.
Qazaq-ózbek baılanysynyń dástúrli bir arqaýy – aýyl sharýashylyǵy salasyndaǵy seriktestik. Qudaıy kórshi eki ultqa da tán qasıet aqyn Abaı tııanaqtaǵan «Eńbek etseń erinbeı, Toıady qarnyń tilenbeı» dep keletin halyq danalyǵynan órbıdi. Osyny meńzegen Memleket basshymyz qarapaıym saýdadan góri et, bıdaı, maıly daqyldar óńdeýdiń tolyq óndiristik úderisin iske asyrýdy, sapaly mal jáne egin sharýashylyǵyn birlese damytýdy usyndy. Bizdińshe, dál osy máselede keń tarıhı maǵynada Abaı men Naýaı jurty álemdik naryqqa tabıǵı taza, qunarly «Túrkistan nany», «Túrkistan dámi», t.b. brendimen azyq-túlik taýarlaryn, ásirese gendik modıfıkasııadan ada et-sút ónimderin shyǵara alary anyq.
Eki el de múddeli joba – ónerkásip kooperasııasy. Shúkir, baýyrlas memleketterge Jaratqan násip etken jerasty, jerústi baılyǵy jeterlik. Prezıdentimiz sırek kezdesetin metaldardy óndirý men óńdeý salasyndaǵy seriktestiktiń bolashaǵyna úmitpen qaraıtynyn da aıtty. Sondaı-aq kólik-tranzıt salasyndaǵy yqpaldastyqty arttyrýǵa, tarıfterdi júıeleýge, shekaralyq ınfraqurylymdy jetildirýge qatysty normatıvtik, ınstıtýsıonaldyq mindetterdi ońtaıly sheshýdi kóterdi.
Qazaqstan basshysynyń Transkaspıı halyqaralyq kólik baǵdaryn, Soltústik – Ońtústik dálizin, Aýǵanstan arqyly temirjol baǵytyn damytýǵa qatysty usynystary da О́zbekstan tarapyna oı saldy. Osy aıada Aqtaý jáne Quryq porttarymen seriktestik qurý, logıstıkalyq jobalardy birlesip júzege asyrý – baýyrlas el qyzyǵatyn bastama. Sonymen birge sý-energetıka salasynda syndarly ustanymda bolý eki memleketke de tıimdi. Transshekaralyq ózender múmkindigin aqylǵa saı paıdalaný álimsaqtan parasat pen yntymaq qaǵıdatymen rettelgen. Osy dástúr Qazaqstan men О́zbekstan úkimetiniń qazirgi sý salasyndaǵy saıasatyna oń yqpal etedi dep sanaımyz.
Jasandy ıntellekt zamanynda tıimdi tájirıbe almasý, bardy bólisý – tatý kórshilik sharty. Memleket basshymyz Qazaqstan Respýblıkasy memlekettik qyzmetterdi sıfrlandyrý men IT-tehnologııa tabystaryn, «Alem.ai» halyqaralyq jasandy ıntellekt ortalyǵy, sýperkompıýter kesheni, álemdik reıtıngidegi ulttyq zertteý ýnıversıtetteri sátti ázirlemelerin áriptestik-dostyq jolymen О́zbekstanǵa usynýǵa daıar ekenin jetkizýi – ıgi parasattyń jóni. «Astana Hub» pen «IT Park Uzbekistan» arasyndaǵy yntymaqtastyq ta baıandy ulysaralyq múddeni kózdeıdi.
Qazaqstan Prezıdenti Q.K.Toqaevtyń mádenı-gýmanıtarlyq baǵyttaǵy baılanystardy óristetý jónindegi bastamalary da О́zbekstan Prezıdenti Sh.M.Mırzııoevtiń qoldaýyna ıe. Osy oraıda el basshysynyń mádenıet kúnderin ótkizý, shyǵarmashyl zııalylar men jastar arasynda sátti suhbattastyq alańdaryn qalyptastyrý, tarıhı tulǵalardy ulyqtaý men tanymaldandyrý, joǵary oqý oryndary fılıalyn ashý týraly usynystary kezeń-kezeńmen oryndalyp keledi.
Tamyrlas, aǵaıyn qos ulttyń da armany – álemde halqy qaýipsiz, memleketi baqýat ádiletti, ozyq oıly, ar-ujdandy, tabysty elge aınalý. Qos jurttyń tabandy kúresi, talaıǵy mehnaty, adal mańdaı teri – baqytqa jetýine sep. О́zbek jurtynda «Jaqsy joldas jol qysqartady» degen mátel bar. Senim men ıman turǵanda biz – bir-birimizdiń baq-berekemizge dáneker joldaspyz. Bul nıetti basqa da baýyrlas jurttarǵa, tilektes kórshilerge qaratyp aıta alamyz.
Zamanynda Samarqand pen Buhara – keıingi Parıj ben Londondaı, Peterbor men Máskeýdeı talaı ulttyń boı túzeıtin, oı túzeıtin shahary bolǵany aqıqat. О́tken ǵasyrlardaǵy ǵulama, bı, bahadúr danalarymyz osy qalalarda oqyp, aýyl-aımaǵyn da taıaý qondyryp, áziz súıegine deıin áýlıeli topyraqtaǵy qorymdarǵa amanattaǵany beker emes. Bedeli bekem Tashkent týraly sóz de osy órede. Tóraǵalyǵyna qazaq ınjeneri Muhamedjan Tynyshbaıuly saılanǵan Túrkistan muhtarııaty (avtonomııa) Qoqanda jarııalansa, О́zbekstannyń ár shahary Alash zııalylary ómirinde orny baryn ańǵaramyz. Eki ult ıntellektýaldarynyń basyn qosqan «Shaǵataı bási», «Talap» mádenı uıymdary – ortaq tarıhymyzdyń jarqyn beti.
Ádiletti Qazaqstan men ar-ujdandy О́zbekstan tamyry tereń ónegeni zamanǵa saı jalǵastyrýǵa múddeli.
