Jurt aldyndaǵy paryzyn qaltqysyz ótep júrgen isker adamdarǵa degen qurmettiń de erekshe bolatynyn Memleket basshysy túıindep aıtqan-dy. Demek, osy lekte biz el ishine súıkimdi jandar jaıly jazýǵa mindettimiz.
...Baýyrjan Ospanov esimin qazir áıgileýdiń qajeti az. Qazaqstandaǵy tabysy zor adamdardyń kóshin bastaǵan kásipker. Jáne bul kisi óziniń týǵan jerine degen sheksiz qurmeti pen qamqorlyǵy úshin aıalaýǵa turatyn adam. Qazir Ospanov týǵan Jylandy aýylynyń aty jeruıyq Jetisý, jalpaq Qazaqstannan asyp, álemge áıgili bolyp ketti. Jáne bul dańq kásipkerdiń esimimen baılanysty emes, kerisinshe shalǵaı aýyldaǵy shaǵyn mekteptiń oqýshylarynyń jetistigi arqyly kelip jatyr.
Osydan biraz jyl buryn Baýyrjan Ospanov týǵan aýylynda fızıka-matematıka baǵytynda tereńdetip bilim beretin mektep-ınternat salyp bergen bolatyn. Balalyq shaǵynda ózi de osyndaı mektepte oqyǵan edi. Úzdik oqyǵany taǵy bar. Jetistikke jetýiniń negizi sol alǵan biliminde jatyr. Sodan ba, qazir únemi izdeniske qumar, top jarýǵa talpynatyn jastardy jınap, qoldaý jasaýǵa daıyn turatyny. Osy oımen aımaqtaǵy daryndy balalardy iriktep alyp, alańsyz bilim alýy úshin jaǵdaı jasaýǵa bel býdy. Aýylda bir kezderi ózine bilim bergen alǵyr ustazdarynyń aldyna mindet qoıdy. Syrttan maqsatyna adal muǵalimderdi izdep taýyp, jumysqa shaqyrdy. Olardy úı-jaı, jalaqymen qamtydy. Barlyǵynyń aldyna jalǵyz maqsat qoıdy: úzdik shákirt tárbıeleý! Mesenattyń talaby qazir tolyq oryndalǵan sııaqty.
– Qazaqtyń balasy eshkimnen kem bolmaýy kerek. Ásirese daryndy, ilimge qushtar óren alańsyz ósip, tek qana oqýǵa yntaly bolýy tıis. Jylandydaǵy mektepte qazir bala qabiletiniń damýyna barlyq jaǵdaı bar. Jurt súısinip jatyr. Birde Atyraýdaǵy olımpıadaǵa barǵan bizdiń balalar aıtyp keldi. Olardyń qurastyrǵan robottaryn kórgen oblys ákiminiń orynbasary qatty tańdanypty. Shynynda, oblystan ári, qaladan tym shalǵaıdaǵy Jylandydaǵy mektepten qazirgi zamanǵy ozyq tehnologııamen basqarylatyn robot jasaýshylar keldi dep kim oılaǵan, ári báıgeni shappaı ber dep tursa, deıdi mesanat rızashylyǵyn jasyra almaı.
Qazir Jylandy aýylyndaǵy daryndy balalarǵa arnalǵan mektep- ınternatta tórt júzge jýyq bala bilim alyp jatyr. Oqýshylardyń qataryn kóbeıtip, 500 oryndyq etsem degen oıy bar eken Ospanovtyń jáne respýblıkanyń túkpir-túkpirinen talantty oqýshylardy tańdap almaq nıette. Bir keremeti, bul mekteptiń oqýshylaryna elimizdegi aıtýly joǵary oqý oryndary jıi «quda túsedi» eken. Bilim sapasynyń kúshtiligine kóz jetkizgen rektorlar Jylandy mektep-ınternatynyń túlekterine tegin grant berýge daıyn. Tipti ınternat túlekteri Máskeý memlekettik ýnıversıtetine shaqyrtý alyp otyr.
Aıtpaqshy, bul mektep-ınternat Baýyrjan Ospanovtyń týǵan jerinde shańyraq kótergen jalǵyz oqý oryny emes. Kásipker Lepsi aýylynan jas sportshylarǵa arnap taǵy bir mektep ashty. Jasópirimderdi sporttyń olımpıadalyq túrlerine baýlıtyn ınternatta qazir elimizdiń jer-jerinen jınalǵan bolashaq sańlaqtar tárbıelenip jatyr. 750 balaǵa arnalǵan mektepte barlyq jaǵdaı bar.
– Adamnyń alǵa basýy úshin tereń bilim, salamatty ómir salty kerek. Meniń mektepterimde osy qaǵıda qatań saqtalady. Oqýshylarǵa «Eldiń atyn shyǵaratyn er bolyp ósý senderdiń mindetteriń, senderge jaǵdaı jasap, eshkimnen kem qylmaı tárbıeleý meniń jumysym» degendi aıtyp otyramyn. Qazaqtyń mártebesi ósip jatsa, oǵan meniń tamshydaı úlesim bolsa, adam úshin basqa baqyttyń keregi ne? – deıdi mesanat Baýyrjan Ospanov.
Bul mysalda biz Baýyrjan Ospanovtyń týǵan aýylynda ashqan qos mektep ınternaty jaıly ǵana tam-tumdap aıtqan boldyq. Áli qıraǵan aýyldy az ǵana ýaqyt arasynda gúldendirip, shatqaıaqtaǵan sharýashylyqty aıaǵynan qalaı tik turǵyzǵany jaıly bólek áńgime bar. Oǵan áli oralamyz.
Qalmahanbet MUQAMETQALI,
«Egemen Qazaqstan»
Almaty oblysy
