Irgesi 1938 jyly qalanǵan óner shańyraǵynyń oblys teatrlary arasynan sýyrylyp shyǵyp, jaqynda ǵana «akademııalyq» joǵary mártebe ıelengennen keıingi alǵashqy saparyn rýhanııat astanasy Almatydan bastaýy tegin emes. Astananyń 20 jyldyǵy men «Rýhanı jańǵyrý» baǵdarlamasy aıasynda ótetin gastroldik saparǵa baılanysty ótken baspasóz jıynyna moderatorlyq jasaǵan Qazaqstannyń eńbek sińirgen qaıratkeri Álııa Bópejanova úlken tulǵalar basshylyq jasaǵan teatrdyń tarıhyna az-kem toqtalyp, ótkenine sholý jasady.
Atyraý teatrynyń alǵashqy uıymdastyrýshylarynyń qatarynda qazaqtyń ulttyq kásibı teatr óneriniń negizin salýshylardyń biri Jumat Shanınniń esimi atalady. Shanınniń basyna bult úıirilip, Máskeýden kóńilsiz qaıtyp kele jatqan jolynda Oral qalasyna túsip qalyp, sol jerdegi teatrdyń kórkemdik jetekshisi bolyp qyzmetke qalady. Jaıyq ózeniniń jaǵasyna alqa-qotan qonǵan kórshiles Atyraý oblysyna gastroldik saparmen keledi. Bul kezde Atyraýda alǵashqy óner stýdııasy ashylyp, Shanın jańadan ashylǵan stýdııanyń jas býyn ókilderine sabaq berip, aqyl-keńesin aıtyp, sahnada oınaýǵa talpynǵandardyń tusaýyn kesedi. Jumat Shanın sekildi kásibı mamannyń taǵylymyn kórgender teatr óneriniń ózine ǵana tán dástúr-mektebin qalyptastyryp, talaı myqtynyń maıtalman atanyp, mańdaıy jarqyrap tanylýyna jol ashady.
Jýyrda ótken «Sahnager- 2018» ulttyq báıgesinde «Eń úzdik menedjer» atanǵan teatrdyń dırektory Berik Jámenov sapar maqsatyn bylaısha túsindirdi.
– Kezinde M.Áýezov atyndaǵy teatrdan keıingi, jalpy elimizdegi ekinshi tulǵaly teatr Mahambet atyndaǵy Atyraý drama teatry bolǵanyn eski kózdiń bári de tegis moıyndaıdy. Byltyr men bıyl teatr úshin jaqsylyqqa toly jyldar boldy. Ár teatrdyń órleýi, baǵy janatyn kezderi bolady. Teatr quramy jastarmen, jańa rejısserlermen tolyǵyp, ótkir, mazmundy dúnıelerdi sahnalaýdy qolǵa aldyq. Almatylyq kórermenderge R.Kıplıngtiń «Maýglı», Iran-Ǵaıyptyń «Súıinbaı», Sh.Aıtmatovtyń «Máńgúrt», «Betpe-bet», E.Dombaevtyń «Kelin» jáne R.Otarbaevtyń «Bas» dramalary usynylyp otyr, – deıdi teatr dırektory Berik Jámenov. Sondaı-aq ol atalǵan akademııalyq qazaq drama teatrynan jastar teatryn bólek shańyraq etip shyǵaryp, oblysta ekinshi oblystyq teatr qurý josparda bar ekenin aıtty.
Aıgúl AHANBAIQYZY,
«Egemen Qazaqstan»
ALMATY
