Chempıonat qorytyndysy boıynsha 1-shi jáne 2-shi orynǵa qol jetkizgen quramalar A tobynyń joǵary dıvızıonynda, ıaǵnı TOP dıvızıonda oınaýǵa múmkindik alady. Sońǵy orynda qalyp qoıǵan ujym V tobynyń I dıvızıonyna syrǵıdy. Al Qazaqstanmen bir topta baq synaıtyn quramalar qatarynda Slovenııa, Italııa, Polsha, Vengrııa jáne Ulybrıtanııa bar.
Elimizdiń hokkeıshilerin álemdik dodaǵa bas bapker Ǵalym Mámbetálıev bastap barady. Ol qurama sapyna negizinen Qurlyqtyq hokkeı lıgasynda (QHL) oınaıtyn «Barys» klýbynyń hokkeıshilerin kóptep tartyp otyr. Sondaı-aq ishinara Joǵary hokkeı lıgasynan (JHL), Qazaqstan chempıonaty men Jastar hokkeı lıgasynan (JHL) oıynshylar bar. Qurama sapyndaǵy hokkeıshilerdiń aty-jónderiniń ishinen halyqaralyq syndarǵa qatysýdan tájirıbesi mol Talǵat Jaılaýovtyń esimin kózimizdiń shalmaǵany kóńilimizdi túsirip tastaǵanyn da jasyrmasaq kerek.
Bir qýantatyny, Ǵ.Mámbetálıev qurama sapyna T.Jaılaýov pen N.Belgibaevty almaǵanymen, Jastar hokkeı lıgasynda óner kórsetetin «Qar Barysynan» jas hokkeıshi Samat Danııar men Astananyń «Nomadynan» Madııar Ibraıbekovti qosypty. Osy jerde Halyqaralyq hokkeı federasııasynyń bir shvesııalyq pen tórt reseılik hokkeıshiniń Qazaqstan quramasynda oınaýyna resmı túrde ruqsat bergenin aıta keteıik. Olar: «sý jańa» Qazaqstan azamattary – qaqpashy Henrık Karlsson, qorǵaýshylar Egor Shalapov pen Roman Rachınskıı, shabýylshylar Dmıtrıı Gýrkov pen Egor Petýhov. Bulardyń arasyndaǵy eń tanymaly – Skandınavııa ókili. Ol «Barys» sapynda 101 oıyn ótkizse, Shvesııa quramasynyń da namysyn qorǵap úlgergen, biraq bári de resmı emes oıyndarda. Sondyqtan Qazaqstan quramasynda oınaýyna múmkindik berilip otyr. Chempıonatqa qazaqstandyqtar qatarynda kanadalyq qorǵaýshy Kevın Dallmenniń de barýy ábden múmkin.
Ǵ.Mámbetálıev álem chempıonatynyń I dıvızıonynda elıtaly topqa joldama úshin is júzinde barlyq qarsylastary talasa alatynyn málimdedi. «Barlyq qarsylastarymyz saıdyń tasyndaı myqty. Onyń ústine vengrler óz alańynda oınaıdy, munyń ózi olarǵa qosymsha kúsh-jiger beretini anyq. Sondaı-aq vengrler Eýrochellendjde de ózderin jaqsy jaǵynan kórsetti, bizden basqa eshkimnen jeńilgen joq», dedi ol. Bas bapker sonymen qatar Slovenııa quramasyn erekshe bóle-jara atady. Sebebi slovenııalyqtar Phenchhanda ótken Olımpııa oıyndaryna qatysqan I dıvızıonda básekege túsetin quramalar arasyndaǵy birden-bir qurama bolyp tabylady. «Polıaktardy da esepten shyǵaryp tastaýǵa bolmaıdy, – deıdi Ǵ.Mámbetálıev. – Italııa quramasynyń kóptegen oıynshylary Kanada mektebinen ótken. Qysqasy, barlyq qarsylastarymyz joldama alýǵa laıyqty».
Ústimizdegi jyldyń aqpan aıynyń ortasynda Qazaqstan quramasy osy I dıvızıonda óner kórsetetin tórt komanda – Qazaqstan, Polsha, Italııa jáne Vengrııa quramalary qatysqan Eýrochellendj kýbogyn jeńip alǵan bolatyn. Sol joly jerlesterimiz úsh jeńisine de negizgi ýaqytta qol jetkizgen edi. Atap aıtqanda, Italııany 1:0, Polshany 4:1 jáne Vengrııany 5:2 esebimen utqan bolatyn. Taǵy bir erekshe atap kórsetetin jaıt, ótken jyly Kıevte ótken álem chempıonatynda Qazaqstan quramasy 2007 jyldan beri alǵash ret álemdik birinshiliktiń joǵary dıvızıonyna birinshi umtylysynan óte almaı súringen-tin. Jáne elıtaly topta qatarynan eki jyl turaqtap qalýǵa da qol jetkize almaı kele jatyr. Keıbir jankúıerler ázil-shyny aralas aıtyp júrgenindeı, birinshi jáne joǵary dıvızıon aralyǵyndaǵy «lıftide» joǵary-tómen syrǵýmen júr.
Quramanyń bas bapkeri týraly О́skemenniń «Torpedo» komandasynyń burynǵy basshylarynyń biri Iýrıı Petýhov bylaı deıdi: «Menińshe, bıylǵy qurama óte álsiz. Buǵan qosa, bas bapkerdiń de joǵary deńgeıde tabysqa qol jetkizetinine senbeımin. Qazaqstan birinshiliginde bapkerlik qyzmet atqarý men álem chempıonatyna baratyn quramany baptaýdyń arasynda jer men kókteı aıyrmashylyq bar».
Sonymen negizinen «Barys» sııaqty QHL-dyń pleı-off kezeńine de óte almaǵan komandadan jasaqtalǵan quramadan shynynda da oń nátıje kútý qıyndaý sııaqty. Onyń ústine bas bapker Ǵalym Mámbetálıev, Iýrıı Petýhov atap ótkendeı, úlken jarystarda synalmaǵan tájirıbesi az maman sanalady. Biraq qazaqstandyq hokkeı jankúıerleriniń teledıdarǵa úlken úmitpen kóz tigetini anyq.
Samat MUSA,
«Egemen Qazaqstan»
