Foto: Sý resýrstary jáne ırrıgasııa mınıstrligi
Sý resýrstary jáne ırrıgasııa mınıstri Nurjan Nurjigitovtiń aıtýynsha, bul jumystar eldiń sý qaýipsizdigin qamtamasyz etýde mańyzdy ról atqarady.
«Mınıstrlik sıfrlyq quraldardy ushtastyra otyryp, sý resýrstaryn basqarýdyń keshendi, kópdeńgeıli júıesin qalyptastyryp jatyr. Mundaı tásil ekonomıkanyń túrli salalarynyń turaqty damýyn qamtamasyz etýge, eldiń sý qaýipsizdigin nyǵaıtýǵa jáne ómirlik mańyzy bar resýrsty bolashaq urpaq úshin saqtaýǵa múmkindik beredi», dedi mınıstr.
Búginde mınıstrlik ázirlegen Sý resýrstarynyń ulttyq aqparattyq júıesi 22 myń sý nysanyn qamtyp otyr. Onyń ishinde 17 myńnan astam ózen, 4 myńǵa jýyq kól jáne gıdrotehnıkalyq nysandardyń 60%-y sıfrlyq júıege engizilgen. Jyl sońyna deıin 6 myńnan astam kanaldy sıfrlandyrý jáne gıdrotehnıkalyq nysandardy qamtý deńgeıin 100%-ǵa jetkizý josparlanǵan.
Sonymen qatar elde biryńǵaı sý balansy qalyptastyrylmaq. Bul júıe sý sharýashylyǵy ýchaskeleri bólinisinde naqty sý aǵynyn, sý qoımalaryndaǵy jınaq kólemin jáne sýdy tutyný deńgeıin ózara salystyrýǵa múmkindik beredi.
Qaýipsizdik máselesi de nazardan tys qalmaǵan. Gıdrotehnıkalyq qurylysjaılar men sý nysandarynyń jaı-kúıi turaqty baqylaýǵa alynyp, ǵaryshtyq monıtorıng pen gıdrobeketterdiń derekteri ıntegrasııalanyp jatyr. Bul sý resýrstaryn basqarýdaǵy ashyqtyqty arttyryp, tótenshe jaǵdaılardyń aldyn alýǵa jol ashady.
