foto: gov.kz
О́tken jyldyń 25 sáýirinde Soltústik Qazaqstan oblysynan áskerge shaqyrylǵan 20 jastaǵy sarbaz 16 mamyr kúni ózin jaısyz sezinip, dene qyzýy kóterilgen soń Aıagózdegi áskerı gospıtalǵa jetkizilgen. Dárigerler tekserip, em taǵaıyndaǵanymen, onyń jaǵdaıy jaqsarmaǵan. Keıin ortalyq aýdandyq aýrýhanaǵa aýystyrylyp, 19 mamyrda jansaqtaý bóliminde qaıtys boldy. Osy derek boıynsha qylmystyq is qozǵaldy.
Sot materıaldaryna sáıkes, aıyptalýshy – áskerı gospıtaldiń emhana bóliminiń 38 jastaǵy meńgerýshisi. Oǵan Qylmystyq kodekstiń 317-baby 3-bóligi («Medısına qyzmetkeriniń kásibı mindetterin tıisinshe oryndamaýy, abaısyzda adam ólimine ákelýi») boıynsha aıyp taǵylǵan.
Jambyl oblysyndaǵy sarbaz ólimi: Komandırdiń salǵyrttyǵy boıynsha tergeý aıaqtaldy
Aıyptalýshy sotta sarbaz alǵash túskende onyń tamaǵy qyzaryp, jeńil jótel men asa joǵary emes temperatýra bolǵanyn aıtty. Ol jaǵdaıdy plasta ant qabyldaýǵa daıyndyq kezinde kún ótýimen baılanystyrǵan. Dáriger jedel nazofarıngıt dıagnozyn qoıyp, aýrýhanaǵa jatqyzǵan.
Alaıda 17 mamyr kúni sarbazdyń jaǵdaıy kúrt nasharlap, dene qyzýy 38,5 gradýsqa deıin kóterilgen, qan qysymy tómendep, qusý men jótel paıda bolǵan. Soǵan qaramastan dáriger emdeý tásilin ózgertpeı, naýqastyń jaǵdaıynyń aýyrlyǵyn der kezinde baǵalamaǵan jáne ony ýaqytyly mamandandyrylǵan stasıonarǵa jibermegen.
Sol kúni keshke sarbaz aýdandyq aýrýhanaǵa jetkizilgenimen, tek kelesi kúni tańerteń ǵana jansaqtaý bólimine aýystyrylyp, jasandy tynys alý apparatyna qosylǵan.
Sot-medısınalyq saraptama qorytyndysy boıynsha, ólimge irińdi menıngıt sebep bolǵan. Ol ekijaqty irińdi otıtten asqynyp, mı isinýine, sepsıske, trombosıtopenııaǵa jáne búırektiń ýytty zaqymdanýyna ákelgen. Sarapshylar dáriger aýrý belgilerin der kezinde anyqtamaı, durys dıagnoz qoımaǵanyn jáne menıngokokk ınfeksııasyna tekserý júrgizbegenin atap ótti. Ýaqtyly ári durys em kórsetilgen jaǵdaıda sarbazdyń ómirin saqtap qalýǵa bolatyny aıtyldy.
Marqumnyń ata-anasy sotta ulyn áskerge jiberer aldynda tolyq medısınalyq tekseristen ótpegenin málimdedi. Olardyń aıtýynsha, 2025 jylǵy 22 sáýirde áskerı komıssarıat qyzmetkerleri kelip, shaqyrtý týraly habarlaǵan. Kelesi kúni olar ulymen birge komıssarıatqa baryp, sol keshte ony qyzmet ornyna jibergen. Anasynyń aıtýynsha, sońǵy ret 14 mamyrda sóıleskende uly densaýlyǵyna shaǵymdanbaǵan.
Semeı garnızonynyń áskerı soty aıyptalýshyny kináli dep tanyp, 2 jylǵa bas bostandyǵynan aıyrý jáne osy merzimge medısına qyzmetimen aınalysý quqyǵynan aıyrý jazasyn taǵaıyndady. Alaıda qylmystyń aýyr emes sanatqa jatatynyn, sondaı-aq onyń úsh balasy baryn jáne aýyrlatatyn mán-jaılardyń joqtyǵyn eskere otyryp, sot ony amnıstııaǵa iliktirdi.
Sonymen qatar sot jábirlenýshi taraptyń azamattyq talabyn ishinara qanaǵattandyryp, sottalýshydan moraldyq jáne materıaldyq shyǵyndar men ókildik shyǵyndardy qosa alǵanda, 12 mıllıon teńgeden astam qarjy óndirý týraly sheshim shyǵardy.
