Onyń aıtýynsha, byltyr qabyldanǵan kodekste Qazaqstan jer qoınaýyn paıdalanýshylarǵa salyq salý, aqparattyń shynaıylyǵy jáne qoljetimdiligi, rásimderdi ózgertý jáne jeńildetý arqyly jer qoınaýyn paıdalaný salasyn zańnamalyq turǵyda retteý jolǵa qoıylǵan. Alaıda, jer qoınaýyn zertteý máselesi atalǵan zańnamada keń aýqymda qarastyrylmaǵandyqtan, kóptegen suraqtar týyndap otyr. Depýtat, normatıvtik quqyqtyq aktilerdi talqylaý barysynda qoǵamdyq ınstıtýttar birlese jumys jasap, konstrýktıvtik dıalog alańynda máseleniń jan-jaqty qamtylýy kerektigin aıtty. О́z baıandamasynda G. Baımahanova eldegi geologııalyq qaýymdastyq asyǵa kútken qujat– memlekettik jer qoınaýy qorlaryn basqarý baǵdarlamasynda jer qoınaýyn memlekettik geologııalyq zertteý aqparatynyń ústirtin jazylǵanyn da synǵa aldy.
«Barshamyz úshin Qazaqstannyń jer qoınaýy, onyń paıdasy men uzaq merzimdi tıimdiligi mańyzdy. Sol sebepti, mamandarǵa mańyzdy mindetter júktelmek. Eń aldymen, sheteldik tájirıbege súıenip, salystyryp, geologııalyq aqparatty jınaý júıesin birizdilendirý kerek. Odan keıin qoldanysqa engiziletin kodekstiń ár babyna saýatty túsinikteme beretin zańgerler tobyn qurý qajet. Osy rette kásibı zańgerler túsindirý jumystarymen keń aýqymda aınalysýy mańyzdy. Buǵan qosa, kodeksti aǵylshyn tiline aýdarylyp, barlyǵy úshin túsinikti bolatyndaı termınologııalyq sózdik daıyndaý − basty atqarylatyn jumystardyń biri», - dedi komıtet hatshysy.
Sonymen qatar forým aıasynda «Respýblıkalyq taý-ken óndirý jáne taý-ken metallýrgııa kásiporyndarynyń qaýymdastyǵy» ZTB atqarýshy dırektory Nıkolaı Radostoves keler jyly ekologııalyq kodekske ózgerister engizip, birqatar máselelerdi zań aıasynda sheshý kerektigin tilge tıek etti. Onyń aıtýynsha, zań aıasynda kásiporyndarǵa tek aıyppul salyp qana qoımaı, qaldyqtar kólemin azaıtý, lastanýdyń aldyn alý syndy mańyzdy mindetter júkteý qajet.
«Ekonomıkalyq yntymaqtastyq jáne damý uıymyna múshe memleketterdiń tájirbıesine súıensek, mamandar zalal keltirgen orynǵa ıa aımaqqa baryp, barlaý júrgizý arqyly máseleniń anyq-qanyǵana kóz jetkizedi. Bul óz kezeginde qaýypti jaǵdaıdyń aldyn alýǵa múmkindik beredi», dedi N. Radostoves.
Erkejan AITQAZY,
«Egemen Qazaqstan»
