Sharaǵa «Qazaqstan» teleradıokorporasııasynyń strategııalyq marketıng departamentiniń jetekshisi Jannur Aıdarbekova men qosymshany júzege asyrǵan kompanııa basshysy Abaı Serǵazıev qatysty.
Bul qosymsha arqyly kórermender korporasııa quramyna kiretin «Qazaqstan», «Balapan» jáne «Qazsport» telearnalarynyń teleónimderin joǵary sapada tikeleı efırde kórý múmkindigine ıe bolmaq. Iаǵnı kez kelgen jerde kez kelgen ýaqytta qalaǵan baǵdarlamany tikeleı efırdiń braýzery arqyly kirip tamashalaýǵa bolady.
Strategııalyq marketıng departamentiniń jetekshisi J.Aıdarbekovanyń aıtýynsha, sıfrlandyrý – bul ýaqyt jáne zaman talaby. «Elbasymyz óz Joldaýynda aqparattyq-tehnologııalyq sheshimderdi engizý qajettigin aıtqan bolatyn. Bizdiń korporasııa da osy tyń bastamadan tys qalmaýdy kózdep otyr. Bul qosymsha arqyly árbir qazaqstandyq súıikti baǵdarlamasyn saqtaý fýnksııasy arqyly júktep alyp, ózine yńǵaıly ýaqytta kóre alady. Sondaı-aq bul qosymshada birqatar fýnksııalar bar», deıdi ol.
«Qazaqstan TV» qosymshasynyń erekshelikterine toqtala keter bolsaq, joǵary sapaly tikeleı efırdiń qoljetimdiligi, baǵdarlamalardy saqtaý múmkindigi, baǵdarlamany yńǵaıly ýaqytta kórý múmkindigi, jańalyqtardy dybystyq tyńdaý sııaqty kóptegen fýnksııalardan turady.
Endi «Qazaqstan TV» qosymshasynyń kórermenderi ıa tyńdarmandary teleradıokorporasııa quramyna kiretin «Qazaqstan», «Valapan» jáne «Qazsport» telearnalarymen qatar, «Qazaq radıosy», «Shalqar radıosy», «Astana» jáne «Klassık» radıolaryn elimizdiń ár buryshynda tyńdaı alatyn múmkindikke ıe bolmaq. «Qazaqstan TV» qosymshasyn AppStore jáne Play Market arqyly júktep alýǵa bolady.
A.Serǵazıev qosymshany nebári bir jarym aıda jasap shyqqanyn aıtty. Qosymshanyń taǵy bir ereksheligi, ony paıdalanýshy estý, kórý qabiletteri tómen jandar úshin arnaıy tetikter qarastyrylǵan.
Mıras ASAN,
«Egemen Qazaqstan»
