Qujatta Ońtústik Koreıa men Soltústik Koreıa 1953 jyldan beri jalǵasyp kele jatqan arazdyqty joıyp, beıbit qarym-qatynas ornatatyny týraly aıtylǵan. Turaqty beıbitshilik júıesin ornatý úshin aldymen Qytaı men AQSh qatysatyn úshjaqty nemese tórtjaqty sammıt ótkizý josparlanyp otyr.
Deklarasııada sondaı-aq KHDR men Ońtústik Koreıa beıbit túrde birigip, damýǵa talpynatyny aıtylǵan. Eki jaq tarap ta bir-birine shabýyl jasamaý týraly kelisimdi tolyqtaı oryndaýǵa daıyn ekendikterin bildirdi. Al eki memleket arasyndaǵy jaǵdaı jaqsara bastaǵanda Seýl men Phenıan qarýlandyrýdy azaıtýdy bastamaq.
Sondaı-aq Phenıan men Seýl Koreı túbeginiń tolyq denýklearızasııasy týraly kelisti. Sonymen qatar osy másele boıynsha halyqaralyq qaýymdastyqpen belsendi áreket etýge ázir ekendikterin aıtty. Sammıt qorytyndysy boıynsha Ońtústik Koreıa prezıdenti Mýn Chje In tolyq dýnekrearızasııa prosesiniń bastalǵanyn habarlady. "Bul tarıhı kezdesý boldy. Endi Koreı túbeginde soǵys bolmaıdy. Búgin Koreı túbeginiń tolyq denýklearızasııasy bastaldy", dedi Ońtústik Koreıa prezıdenti Mýn Chje In. Al Kım Chen Yn óz sózinde eki Koreıanyń birigetinine úmittenetinin aıtty. "Men bolashaqta Ońtústik pen Soltústiktiń birigetinine senemin. Biz - bir halyqpyz. Bizdiń qanymyz bir. Biz bólek júrmeýimiz kerek", dedi ol.
