"Assambleıa qurylǵan kúnnen bastap elimizdegi myzǵymas birliktiń uıytqysy, sarqylmas berekeniń bastaýy bolyp keledi. Búgingi kúni ol elimizdiń tatýlyǵy men turaqtylyǵynyń eń basty kepili. Árdaıym eldik isterdiń basynda júretin Assambleıa meniń irgeli bastamalarymdy ár ýaqytta qoldap, halyqqa túsindirip júredi. Qazaqstan san-qyrly jańǵyrýǵa bet burǵan qazirgi tańda Assambleıaǵa da tyń mindetter júkteledi», - dedi Elbasy Nursultan Nazarbaev.
Sessııa taqyrybynyń áleýmettik jańǵyrý jolyndaǵy bes áleýmettik bastamamen úndes ekenin ataǵan Memleket basshysy eldiń ál-aýqatyn jaqsartýda birlik pen tatýlyqtyń mańyzy erekshe ekenin aıtty.
“Búgingi sessııamyz «Bes áleýmettik bastama - qoǵamnyń áleýmettik birliginiń tuǵyry» dep atalady. Men naýryz aıynda áleýmettik jańǵyrý jolyndaǵy Prezıdenttiń bes bastamasyn usynǵanymdy ózderińiz bilesizder. Bes bastama eldiń ál-aýqatyn jaqsartýmen birge ultty uıystyra túsýdiń taǵy bir qyry - áleýmettik birlikti nyǵaıtýǵa baǵyttalǵan. Onyń tabysty júzege asyrylýy azamattardyń óz bolashaǵyna, memleketine, qoǵamyna, qala berdi bir-birine degen senimin arttyrady. Bizde halyqtyń kúndelikti ómirine túbegeıli ózgeris ákeletin mundaı áleýmettik baǵdarlama buryn bolǵan emes. Osynyń barlyǵy Táýelsizdik jyldarynda Qazaqstandy túrli pále-jaladan saqtap kele jatqan eldigimizdiń boıtumary - el birligin qasıet tuta bilgenimizdiń arqasy. Áıtpese ózderińiz qazir kórip bilip otyrsyzdar, dúnıejúzinde kóginde týy, tórinde bıligi bolsa da birligi qashyp, búgini buldyr, bolashaǵy bulyńǵyr bolǵan qanshama memleket bar. Biz osyny berik ustanyp myzǵymas yntymaq-birligimizdi taýsylmas yrys-berekemizdiń bastaýy etip, senimmen qadam basyp kelemiz. Osy joldan taımaýymyz kerek. Osy birlikpen júretin bolsaq, barlyq qıyndyqtardy eńseremiz. Halyqtyń ál-aýqatyn jaqsarýǵa qyzmet isteımiz», - dedi Elbasy.
