Birneshe kún buryn Búkilálemdik boks federasııasy (IBF) Gennadıı Golovkınniń komandasyna resmı hat jibergen, onda bylaı delingen: Qazaqstandyq boksshy Vanes Martırosıanmen ótetin kezdesýden keıin, uıymnyń belbeýine mindetti qarsylas Sergeı Derevıanchenkomen jekpe-jek ótkizý týraly kelisimge kelýi tıis jáne 3 tamyzǵa deıin ýkraınalyq boksshymen jazbasha kelisim jasalýy kerektigi aıtylǵan. Eger GGG bul hatty elemeıtin bolsa, onyń belbeýi avtomatty túrde vakantty bolady.
Vesti.kz málimetinshe, orta salmaqta WBA (Super), IBO, WBC jáne IBF tujyrymdary boıynsha álem chempıony qazaqstandyq boksshy Gennadıı Golovkın (37-0-1, 33 KO) IBF uıymynan belbeýdi qorǵaýdy keıinge shegerý týraly ruqsat alǵan.
Golovkın osy jaǵdaıdy durystaý úshin 20 myń dollar bergen, ıaǵnı bul qarajat qazaqstandyq boksshynyń tıtýldy saqtap qalýy úshin bergen.
Boks uıymymen kelisim boıynsha, Golovkınniń kelesi qarsylasy mindetti túrde ýkraınalyq Derevıanchenko bolýy tıis.
Eske salaıyq, Martırosıanǵa qarsy kezdesýde Golovkın WBA (Super), IBO jáne WBC belbeýlerin qorǵaıdy. Al IBF bul kezdesýdi maquldamaǵandyqtan, qazaqstandyq boksshy bul belbeýin qorǵamaıdy. Jekpe-jek 5 mamyr kúni Karson qalashyǵyndaǵy (Kalıfornııa shtaty, AQSh) StubHub Center sport kesheninde ótedi. Bul kezdesýde Martırosıan jekpe-jekke eki aı qalǵanda dopıngpen ustalǵan Saýl "Kanelo" Alvarestiń ornyna basady.
