Budan keıin merekelik shara Qymyzmuryndyq merekesine jalǵasyp, qala turǵyndary men qonaqtaryna saýmal qymyz, besti qymyz túrleri usynyldy. Ortalyq alańda halyq nazaryna «Yntymaq. Baılyq. Kelisim. Eń basty baılyq el úshin» atty qalalyq Mádenıet úıi, Dostyq úıiniń túrli etno mádenı ortalyqtarymen uıymdastyrylǵan konserttik baǵdarlama qoıylyp, shyǵys halyqtarynyń ulttyq oıyndary nasıhattaldy. Semeıdiń kitaphana, mýzeılerinde bul kúni «Ashyq esik kúni» ótti. Sondaı-aq, tústen keıin Ortalyq mádenı saıabaqta «Berekeli beıbit el» atty konserttik baǵdarlama ótkizilmek.
- «Qymyzmuryndyq» merekesin Qazaqstan halyqtary Birligi kúnine oraılastyryp otyrǵanymyzdyń syry úlken,-dedi Semeıdegi musylman áıelder odaǵynyń tóraıymy Gúljıhan Jumataeva,-qazaq halqynyń jaılaýǵa shyǵyp, bıe baılap, alǵash ret qymyz ishkende jasaıtyn toıy. Toıǵa týǵan-týys, jekjat-juraǵat, kórshi-qolańnyń barlyǵy jınalady. Kóshpendi qazaq óz tirliginde bir maýsymda ǵana emes, jyl boıy bıe baılap, qymyz ashytýdyń syryn bilgen.Osy sharany uıymdastyrýshylardyń qatarynda «Ahaý, Semeı» etnomádenı ortalyǵynyń ájeleri men «Musylman áıelderi odaǵyndaǵy» aq jaýlyqty analar jáne Qazaq áleýmettik mádenı ortalyǵy men Ortalyq saıabaq ujymy da bar. Merekege kelgenderdiń barlyǵyna tegin qymyzdy keselerine toltyra-toltyra quıyp berdik. Berisi 700 lıtr, arysy 1000 lıtr qymyz ishildi.
Merekede Semeıdegi Dostyq úıiniń barlyq etnomádenı ortalyqtary men túrli ult ókilderi óz qoldarymen jasaǵan kórkemóner týyndylarynan kórme uıymdastyryldy.
- Kez kelgen ulttyń salt-dástúri bar, olardyń barlyǵy da baýyrmaldyqty nasıhattaıdy,-dedi merekege qatysýshy tatar mádenı ortalyǵynyń tóraıymy Kamılııa Ismaılova,-táýelsizdik alǵannan beri kóptegen salt-dástúrimiz, ulttyq merekelerimiz qaıta oraldy. Tatarlardyń «Sabantoıy», Shyǵys halqynyń «Naýryzy» nemese osyndaı «Qymyzmuryndyq» merekeleri el birliginiń dáleli deı alamyn.
Raýshan NUǴMANBEKOVA
