Qazaqstan Respýblıkasynyń Tuńǵysh Prezıdenti – Elbasy Qorynyń uıytqy bolýymen osymen tórtinshi ret uıymdastyrylyp otyrǵan ǵylymı jobalar baıqaýynyń maqsaty – qazaqstandyq stýdentterdiń shyǵarmashylyq áleýetin arttyrý jáne jastardy ǵylymı keńistikke ıntegrasııalaý.
Baıqaý barysynda stýdentter túrli jobalardy qazylar alqasynyń nazaryna usyndy. Olardyń arasynda gúl satatyn avtomattar, erekshe qaǵaz stakandar, ınnovasııalyq aýa tazartqyshtarǵa deıin bar. 19-20 sáýir aralyǵynda ótken saıysqa Almaty, Astana, Pavlodar, Aqtóbe men Shyǵys Qazaqstandaǵy joǵary oqý oryndarynyń bilimgerleri qatysty.
Qyzdar Ýnıversıtetiniń atynan qatysqan «Áleýmettaný» mamandyǵynyń 4-kýrs stýdenti Ásel Besimbaeva, «Áleýmettaný» mamandyǵynyń 3-kýrs stýdenti Aınur Baqytjanova, «Memlekettik jáne jergilikti basqarý» mamandyǵynyń 3-kýrs stýdenti Aıjan Mamytova, «Matematıka» mamandyǵynyń 4-kýrs stýdenti Ińkár Almabek jáne «Dene shynyqtyrý jáne sport» mamandyǵynyń 4-kýrs stýdenti Evgenııa Vasıleva barlyq kezeń boıynsha úzdik dep tanylyp, júlde qory 1 mıllıon teńgeni quraıtyn syıaqyǵa ıe boldy.
– Jastar bolǵannan keıin olardyń oıyna kóptegen ıdeıalar keledi jáne ony júzege asyrý úshin qarjy jaǵynan qolbaılaý bolyp otyrady, kóbinese. Elbasy Qorynyń muryndyq bolýymen uıymdastyrylyp otyrǵan osy sııaqty ǵylymı jobalar baıqaýy ózindik oıy hám jobasy bar jastarǵa qoldaý kórsetýge kóp múmkindik beredi. Saıysqa elimizdiń óńirlerinen 40-tan astam stýdent keldi. Sonyń ishinde Qyzdar Ýnıversıtetiniń bilimgerleri ózgelerden oq boıy ozyp shyǵyp, úzdik atandy, – deıdi top jetekshisi, Qoǵamdyq-gýmanıtarlyq pánder kafedrasynyń oqytýshysy Rıma Saýytbaeva.
