Aqtyq saıys qalanyń ortalyq meshitinde ótti. Qarılerge qoıylǵan basty talap Quran súrelerin jatqa oqyp qana qoımaı, mánine saı mánerlep, áýezi men naqyshyna keltirip jetkizý. Qatysýshylar Qurannyń 10 parasyn jatqa oqý, Qurandy mánerlep oqý, 20 para Qurandy jatqa aıtý jáne qasıetti kitapty tolyq jatqa oqý syndy tórt baǵyt boıynsha baq synady. Ár aımaqtan sýyrylyp shyqqan qarılardyń deńgeıi joǵary bolǵandyqtan ádil-qazylar alqasy úshin jeńimpazdy anyqtaý ońaı bolǵan joq. Bas júldegerden bólek, Qurandy mánerlep oqýdan 1 oryn alǵan qatysýshyǵa 500 myń teńge, 10 para boıynsha jeńimpaz dep tanylǵan janǵa 1 mıllıon teńge, 20 para boıynsha kósh bastaǵan qatysýshyǵa 1 mıllıon 500 myń teńge tabystaldy. Oǵan qosa ár óńirden kelip qatysyp júldeli oryndarǵa ıe bola almaǵan qarılarǵa da arnaıy alǵys hat pen 50 myń teńge kóleminde qarjylaı syıaqy berildi.
«Basty maqsat bizdiń ata-babamyzdyń dini ıslamnyń kitaby Qurandy nasıhattaý. Qurandy jattaýdy nasıhattaý. Qurandy jattaǵan qarılardy hafızdardy yntalandyrý. Quran kárimdi jatqa jáne mánerlep oqý boıynsha álemde halyqaralyq jarystar ótedi. Búgingi jarysty sol halyqaralyq jarystarǵa barýǵa laıyqty qarılardy, Qurandy jattaǵan mamandardy anyqtaý úshin ótkizip otyrmyz», - deıdi Almaty qalasynyń bas ımamy Erkinbek Shoqaı.
Jarystyń sońǵy kúni Allany ulyqtaıtyn ánder shyrqalyp, salaýat aıtyldy. Jınalǵan jamaǵatty quttyqtaǵan bas múftı Qazaqstanda Qurandy jatqa biletin qarılardyń kóbeıip kele jatqanyn tilge tıek etti.
«Keshegi náýbettik kezeńde bizde múlde Qurandy tolyq jattap, oqyp nemese úıretetin dástúrli mektep bolǵan joq. Búgingi tańda bizdiń elimizde quran qarılaryn daıyndaıtyn tórt birdeı oqý orny júıeli túrde jumys istep kele jatyr. Sonyń nátıjesinde 500-diń ústinde Quran qarılarymyz bar. Demek, ol bolashaqta arta beredi degen sóz» - deıdi Qazaqstan musylmandary dinı basqarmasynyń tóraǵasy, bas múftı Serikbaı Qajy Orazuly.
Arman OKTIаBR,
«Egemen Qazaqstan»
ALMATY
