Týysqan elderdiń tutastyǵy tuǵyrlana bersin

Rejep Erdoǵan О́zbekstanǵa jasaǵan memlekettik sapary barysynda eki eldiń arasyndaǵy áriptestik qarym-qatynastardy tereńdetýdi kózdegen syńaıly. Ystambul­dyń Atatúrik áýejaıynda О́zbekstanǵa shyǵar sapary aldynda jýrnalısterge bergen shaǵyn suhbatynda ol: «Túrkııa men О́zbekstan osy ýaqytqa deıin joǵal­typ kelgen múmkinshilikterin qalpyna keltiredi degen úmittemin», dedi. Sonymen qatar R.Erdoǵan О́zbekstanda ımamdar ál-Buharı jáne Matýrıdı atyndaǵy ǵylymı-zertteý ınstıtýttaryn ashý jospary bar ekenin aıtqan. «Biz О́zbekstan basshylyǵymen bul máselelerde birtekti ustanymdamyz. Osy sapardyń barysynda ózbek basshylyǵymen nátıjeli sheshimge kelýden úmittemin» degen edi ol.

Jalpy, Azııaǵa baǵyttalǵan bul saparyn Túrik Prezıdenti О́zbekstan Res­pýblıkasy men Ońtústik Koreıaǵa arnaǵan eken. О́zbekstannan ári ol at basyn Azııa jolbarysynyń biri atanǵan Seýlge burdy.

Jeksenbi kúni Tashkent áýejaıyna qon­ǵan ony О́zbekstan premer-mınıstri Abdýlla Arıpov qarsy alyp, «Kók­saraıda» О́zbekstan Prezıdenti Shavkat Mırzııoevpen bolatyn kezdesýge alyp keldi. Kelissózder aldymen shaǵyn, sosyn delegasııalardyń qatysýymen keńeıtilgen quramda jalǵasyp, onyń nátıjesinde ekijaqty yntymaqtastyqtardy arttyrýǵa úles qosatyn 25 qujatqa qol qoıyldy. Jýrnalıstermen bolǵan baspasóz konferensııasynda О́zbekstan Prezıdenti Shavkat Mırzııoev qadirli qonaǵyna Túrki áleminiń bolashaǵy zor ekenin aıta kelip, basqa sózdermen qatar óz eliniń Túrki keńesine qosylý týraly sheshim qabyldaǵanyn da jetkizdi.

Odan ári Erdoǵan О́zbekstan parla­mentinde (Olıı Májilis) kezdesý ótkizip, on­daǵy sózinde ózin «Atajurttaǵy óz úıi­mizde júrgendeı sezinemiz. Búgin biz 25 eki­jaqty kelisimshartqa qol qoıdyq. Búginge deıin Túrkııa men О́zbekstan bir joly osyn­shama kóp kelisim jasamaǵan bolatyn» dep atap kórsetti. Shyn máninde eki eldiń arasynda munshalyqty kóp ekijaqty qujattarǵa buryn-sońdy qol qoıylmaǵan edi. Osyǵan eki memlekettiń basshylary da rızashylyq sezimde ekenin aıta kelip, R.Erdoǵan: «Júrekteri jaqyn adamdar úshin qashyqtyq kedergi keltire almaıdy. Bizdiń túsinigimizde baýyrlastyq – eń qymbat qazyna. О́zbekstannyń táýel­sizdigin qaıtadan alýy ózbek baýyr­lar sekildi túrik ulty úshin de úlken maq­tanysh boldy» dedi.

Al ózbek-túrik isker qaýymynyń bıznes forýmynda sóılegen sózinde Rejep Taııyp Erdoǵan aǵynan jarylyp, О́zbekstan ekono­mıkasynyń múmkinshilikterine joǵary baǵa berdi. «О́zbekstannyń jeri bereketti. Bul jerden barlyǵy shyǵady. Tek jumys isteý kerek. О́zbekstannyń qaıta órleýi jolyndaǵy qadamdaryn quptaýǵa Túrkııa barlyq kómekterdi berýge daıyn. Shavkat Mıramanovıch Mırzııoev baýyryma túrik azamattaryna vıza jeńildigin bergeni úshin taǵy bir ret alǵys bildiremin», dedi ol. Sonymen qatar ol eki el arasyndaǵy qarym-qatynastardyń strategııalyq deń­geıge kóterilgenin, naq osy sapar arqyly baı­lanystardyń tereńdeı túskenin aıtty. Sóz retinde ol Túrkııanyń álemniń 17-shi, Eýropanyń 6-shy ekonomıkasy ekenin de eske salyp ótti. 81 mıllıon halqy, 390 mıllıard dollarlyq syrtqy saýdasy Túrkııa О́zbekstan úshin úlken naryq ekeni de aıtyldy.

Al 1 mamyr kúni R.T.Erdoǵannyń sapary din musylmannyń ǵylymı orta­lyq­tarynyń biri Buhara qalasynda jal­ǵa­syp, mártebeli meıman osyndaǵy ál-Buharı qabi­rine zııarat etti. Musylman ǵula­ma­lary­nyń biri Bahaýddın Nakshban­dı­diń Abdýlla Ázizhan ıbn Ýbaıdýllahan 1544 jyly turǵyzǵan kesenesine kirerde Túrik delegasııasynyń quramyndaǵy Din isteri basqarmasynyń bastyǵy Álı Erbash Quran oqyǵan. Keıbir habarlarǵa qara­ǵanda Túrik Prezıdenti Rejep Taııyp Erdoǵan Nakshbandıdiń tarıkattaryna zor qurmetpen qaraıdy eken.

Osy jerde Túrik Respýblıkasynyń delegasııasy keshen aýmaǵynda ornalasqan medresege de kirip, qurmet kórsetken. Sondaı-aq túrik delegasııasy Ark qamaly men Poı-Kalıan keshenine baryp qaıtty.

Sóıtip Túrkııa Respýblıkasynyń Pre­zıdenti R.Erdoǵan óziniń О́zbekstan Res­pýb­lıkasyna jasaǵan memlekettik saparyn aıaqtady. Pragmatıkalyq baǵyt us­taly­natyn qazirgi saıasatta tek kelisimder men kelissózder ǵana ozyp, qorqytý, tize batyrý, qyr kórsetý nemese tipti ókpe-naz sııaq­ty oǵash dúnıelerdiń bári artta qalǵanda týys­qan halyqtardyń arasyndaǵy osyndaı qatynastardy Qazaqstan tek qoldaıtyny belgili.

Jaqsybaı SAMRAT,

«Egemen Qazaqstan»