Bıylǵy kóktemniń eń mańyzdy jekpe-jegi meksıkalyq Saýl Alvares pen otandasymyz Gennadıı Golovkın arasynda ótýi kerek bolatyn. Alaıda meksıkalyq boksshy klenbýterolmen ustalyp, Nevada atletıkalyq komıssııasy ony tyıym salynǵan dári qoldandy dep, jarty jylǵa bokstan shettetti. Besinshi mamyrdaǵy Golovkın-Alvares kezdesýi keıinge shegerilgen soń, Golovkın jankúıerlerine ýáde etkendeı dál sol kúni jekpe-jek ótkizýge nıetti boldy. Sóıtip Gennadıı 5 mamyr kúngi aıqasqa ózine qarsylas izdeı bastady. Otandasymyzǵa qarsy shyǵýǵa Demetrıýs Andrade, Djermall Charlo, Sergeı Derevıanchenko men Garrı O’Sallıvan syndy boksshylar daıyn ekendikterin jetkizgenimen, olarǵa usynǵan syıaqy óte az mólsherde bolǵandyqtan jáne taǵy basqa sebeptermen birqatary aıqastan bas tartty.
Al Gennadıı Golovkınniń IBF belbeýine negizgi úmitker boksshy Sergeı Derevıanchenkonyń komandasy Golovkınniń promoýterine birneshe ret jekpe-jek ótkizýge usynyspen shyqqanymen, ony Tom Leffler qaıtaryp tastady. Sebebi dál qazirgi jaǵdaıda Golovkın úshin Derevıanchenko qarjylyq jaǵynan, kórermen tartý men bılet satý jaǵynan jáne taǵy basqa talaptar boıynsha óte tıimsiz qarsylas.
Negizi Golovkın áý basta Alvarespen jekpe-jek ótkizetin bolyp kelisken soń, búkil daıyndyǵy men josparyn soǵan qaraı qurǵan bolatyn. Al qysqa merzim ishinde Golovkınge qaıtadan jospar qurý tıimsiz edi. Sondyqtan ol judyryqtasý stıli meksıkalyq boksshyǵa saı keletin qarsylas izdedi. Izdegenge suraǵan degendeı, Golovkınge Martırosıan tabyla qaldy jáne onyń shartyna da kóndi. Sondaı-aq Golovkın úshin úmitkerlerdiń ishindegi eń qaýipsizi Martırosıan boldy. Vanes 2016 jyly Erıslandı Laradan jeńilgennen keıin eki jyldaı jekpe-jekke shyqpaǵan jáne orta salmaqta eshqashan judyryqtasyp kórmegen.
Qalaı qarasaq ta, 5 mamyrǵa josparlanǵan úlken jekpe-jektiń ornyna Tom Leffler Golovkınge kezdesý uıymdastyryp berdi. Degenmen Golovkın bárin shegerip qoıyp, aldaǵy Alvares, Sonders nemese Derevıanchenkomen úlken jekpe-jek daıyndaýy kerek edi. Jalpy, 5 mamyrda bizdi aldamshy aıqas kútip tur. Sebebi eki boksshy da jaqsy aqsha tabady jáne ekeýi de táýekelge barmaıdy. Bylaısha aıtqanda, balyqsyz jerde Martırosıan da shortan bola alady.
Jankúıerler arasynda «Golovkın nege dál bul datada jekpe-jek ótkizbekshi?» degen zańdy saýal týyndaıtyny anyq. Bul suraqtyń jaýaby mynadaı: 1862 jyly 5 mamyrda Pýeblo túbinde Meksıkanyń 4000 áskeri 6500 adamy bar fransýz áskerine qarsy turyp, jeńiske jetken-tuǵyn. Golovkınge de osy kúni jekpe-jek ótkizý úshin meksıkalyq boksshy kerek boldy. Degenmen jankúıerlerdiń de, uıymdardyń da kóńilinen shyǵatyn meksıkalyq boksshy tabylmaǵan soń, bul joly meksıkalyqtyń rólinde Golovkın, al Vanes Martırosıan kútpegen jerden bas salǵan fransýz áskeriniń rólinde bolmaq. Jankúıerlerdiń Golovkınnen kútetini de osy – aıaýsyz jekpe-jek, afıshada jazylǵandaı «mexicanstyle».
Jekpe-jek qarsańynda álemdik jáne otandyq boks sarapshylary men mamandar óz pikirlerin aıtyp jatyr. Qazaqstan kásipqoı boks federasııasynyń vıse-prezıdenti Vıktor Demıanenkonyń aıtýynsha, Golovkın kúzge deıin rıngke bir ret bolsyn shyǵyp, sharshy alańǵa boıyn úıretip alý kerek deıdi.
«Bul Golovkınniń karerasyndaǵy orta deńgeıli boksshynyń biri. Degenmen Golovkınniń usynysyna kim kelisti, ol sony tańdady. Gennadıı – orta salmaqtyń chempıony jáne ol kimmen judyryqtasatynyn ózi sheshedi. Árıne Derevıanchenko Martırosıanǵa qaraǵanda laıyqty qarsylas. Biraq Gennadıı táýekelge barǵan joq. Al jekpe-jekti 5 mamyrda ótkizýin durys sheshim dep qabyldaımyn. О́ıtkeni oǵan is júzinde tájirıbe kerek. Golovkın byltyrǵy qyrkúıekten beri sharshy alańǵa shyqqan joq. Sondyqtan ol aldaǵy kúzge deıin rıngke bir ret bolsyn shyǵyp, sharshy alańǵa boıyn úıretý kerek», deıdi ol.
Al amerıkalyq boks kommentatory Djek MakKaferrı Golovkın Martırosıandy tańdap, durys sheshim qabyldady deıdi. «GGG óte durys sheshim qabyldady. Ol barlyq múmkindigin iske salyp, ózine laıyqty qarsylas tapty dep oılaımyn. Jalpy, «Kanelonyń» dopıng-daýyna ilikkeni Golovkınniń búkil josparyn joqqa shyǵardy. Sondyqtan onyń qazirgi tańda kez kelgen qarsylasty tańdaýyna quqyǵy bar».
Golovkın Martırosıanǵa qarsy jekpe-jekke barlyq beldigin ortaǵa salyp otyr. Buǵan deıin Halyqaralyq boks federasııasy (IBF) ózderiniń beldigin Vaneske qarsy qorǵaýǵa qarsylyq bildirgen. Uıymnyń aıtýynsha, qazaqstandyq boksshy mindetti qarsylas ýkraınalyq Sergeı Derevıanchenkomen kezdesýi kerek bolǵan. Alaıda Gennadııdiń komandasy IBF uıymynan belbeýdi qorǵaý merzimin keıinge shegerýge ruqsat surap, atalǵan uıymǵa 20 myń dollar ótemaqy tólegen. Degenmen IBF ýkraınalyq boksshymen qaǵaz júzindegi kelisimshart 3 tamyzǵa deıin jasalýy tıis. Bul shart oryndalmaǵan jaǵdaıda Golovkın IBF belbeýinen aıyrylyp qalýy múmkin.
Sonymen qatar Golovkın men Martırosıanǵa Dúnıejúzilik boks keńesi (WBC) arnaıy beldik jasatqan. Bats'il Ajaw Chiapas dep atalatyn belbeý resmı nusqasy boıynsha «Naǵyz batyr belbeýi» degen maǵynany bildiredi jáne ol WBC negizin qalaýshy, Meksıka prezıdenti Adolfo Lopes Mateostyń qurmetine arnalǵan.
Búginge deıin Golovkın-Martırosıan aıqasyna alty myńǵa jýyq bılet satylǵan eken. Boks keshiniń eń arzan bıleti 53 dollar bolsa, eń qymbat bılet 767 dollar kóleminde. Resmı málimet boıynsha StubHub Center arenasynyń syıymdylyǵy 8 myń oryn. Demek áli de eki myńǵa jýyq bılet satylymda degen sóz.
Golovkın-Martırosıan boks keshinde birinshi jartylaı orta salmaqta judyryqtasatyn otandasymyz Rýslan Mádıev te óziniń kezekti kezdesýin ótkizedi. Búginge deıin 11 kezdesý ótkizip, barlyǵynda jeńiske jetken Mádıev meksıkalyq Hesýs Perespen aıqasady.
Peres te óte qarymdy boksshy. Kásipqoı boksta 21 jekpe-jek ótkizip, 16 qarsylasyn merziminen buryn jeńgen.
Keshe StubHub Center arenasynda judyryqtasatyn boksshylardyń barlyǵy baspasóz máslıhatyna qatysyp, jekpe-jek aldyndaǵy kóz arbasý rásiminen ótti. Jekpe-jekti amerıkalyq HBO telearnasy tikeleı efırde kórsetedi. О́kinishke qaraı, qazaqstandyq jankúıerler Golovkın men Martırosıannyń qatysýymen ótetin boks keshin otandyq telearnalardan kóre almaýy múmkin. О́ıtkeni elimiz boıynsha búkil aımaqqa taralatyn, aıqasty kórsetedi-aý degen negizgi úsh telearnanyń baǵdarlamalar kestesinen Golovkın-Martırosıan kórsetilimin taba almadyq.
Sonymen eki boksshy aıqasqa tas-túıin daıyn. Siz ben biz sekildi jankúıerlerge naǵyz boks keshin syılaýǵa daıyn ekendikterin de jetkizdi. Al endi Gena jeńe me, Vanes basym bola ma, oǵan 5 mamyrda kýá bolamyz.
Álı BITО́RE,
«Egemen Qazaqstan»
