Baılyq pen kedeılik, tektilik pen toǵysharlyq, jomarttyq pen sarańdyq sekildi máńgilik taqyryptardy arqaý etken týyndy tek qarynnyń qamyn oılaıtyn Qarynbaı, bar bolsa aspaıtyn, joq bolsa saspaıtyn, bardy emes, ardy baılyq sanaıtyn Bektas jáne aqyldy, ınabatty Ǵazıza obrazdary arqyly barynsha ashyla túsken deýge bolady. Oqıǵa negizinen osy úsh tulǵa tóńireginde órbıdi. Jany jomart Bektastyń ákesi ómirden ótedi, tekti ákeden qalǵan baılyqty ol tilenshilenip kelgen kedeı-kepshikke taratady, qalǵanyn Ǵazızanyń esersoq kúıeýi Qarynbaı jandaıshaptarymen birge tonap, tartyp alyp, ózin kógala qoıdaı etip sabap ketedi. Kıerge kıimi, isherge asy qalmaǵan Bektas bazar jaǵalap, meımanasy tasyǵan Qarynbaıdyń aldyna kelgende qolshoqparlary dym tattyrmaıdy. Úmitin úzip syrtqa bet alǵanda júregi meıirimge toly Ǵazıza jany ashyp, ústindegi qymbat baǵaly kamzolyn sheship beredi. Shıelenis, aıqaı-shý osy jerden bastalady. Qarynnyń ǵana qamyn oılaıtyn Qarynbaı buǵan tózsin be? Ashýǵa minip, «beregen qolyń osy ma?» dep óziniń súıikti jary Ǵazızanyń oń qolyn shaýyp tastaıdy. Onymen qoımaı, qorǵansyz kelinshekti dalada qaldyrady. Qysqarta aıtqanda, qolsyz qalǵan kelinshekti jalǵyzbasty qarııa taýyp alyp, úıine aparady, as-aýqatyn beredi, bar meıirimin tógedi, eń sońynda óziniń qolynan aırylýǵa sebep bolǵan burynǵy tilenshi jigit – keıingi saýdager, kerýenbasy Bektaspen kezdesip, shańyraq qurady.
Qoıylymnyń bir ereksheligi, Aqyt qajy Úlimjiuly sahnada boı kórsetip, naqylǵa toly óleńderin oqıdy. Eli úshin jasaǵan eńbegi eren bolsa da, biz úshin áli de beımálim tulǵanyń rólin somdaǵan teatrdyń beldi akteri Qanat Nııazbekov ǵulama beınesin bederleý ońaıǵa túspegenin aıtady. «Qıyndyq boldy. Qıyndyq bolǵany – bizdiń Aqyt babamyzdy jóndi bilmeıtindigimizde. Sondyqtan Dáýletkereı Kápuly sekildi keıipkerimiz jaıynda ǵylymı joba qorǵaǵan azamattarǵa júginýge týra keldi. Sonyń ózinde Aqyt qajyny tolyq bildik, tanydyq dep aıta almaımyn. 15-20 paıyz deýge bolatyn shyǵar. Qoıylym barysynda aqynnyń ómir, baılyq, kedeılik, sarańdyq týraly óleńderin oqydym. Bul týyndynyń búgingi jastarǵa bereri kóp dep oılaımyn», - deıdi ol. «Bul róldi alǵanda qatty tolqydym. «Qalaı shyǵar?» eken dep kóp ýaıymdadym. Áıel adamnyń tartqan aýyrtpashylyǵy men kúıeýinen kórgen qorlyǵyn beıneleý, ony óne boıyńnan ótkizý, seziný ońaı bolǵan joq. Baǵasyn kórermen bere jatar», - deıdi qoly sholaq bolsa da júregi keń, salıqaly, zerdeli kelinshek – Ǵazızanyń rólin oınaǵan teatrdyń aktrısasy Almıra Aıtjanova.
Dramanyń rejısseri, teatrdyń kórkemdik jetekshisi Sahan Ákeleevtiń aıtýynsha, qoıylym elimizdegi teatrlardyń ishinde tuńǵysh ret О́skemende sahnalanyp otyr. «Eń áýeli Aqyt Úlimjiulyn 10 jyl boıy zerttep, eki tomdyq jınaǵyn shyǵarǵan Gúlnár Omarovaǵa erekshe alǵysymdy bildirgim keledi. Qaryndasymyz Mádenıet mınıstrligi men oblys ákimderine arnaıy hat jazǵan eken. Elimizdegi eshbir teatr nazar aýdarmaǵan hat oblystyq Mádenıet basqarmasy arqyly bizdiń teatrǵa kelgende birden nazar aýdaryp, eleń ettik. «Sholaq qol kelinshek» pesasy Mońǵolııanyń Memlekettik syılyǵynyń ıegeri, sol eldegi zııaly azamattardyń biri Shynaı Rahmetulynyń sahnalyq jobasymen 90 jyldary qoıylǵan eken. Biraq uzaq júrmepti. Ol kisi pesanyń sońyna: «Osyny tiriltken adamǵa Allanyń nury jaýsyn» dep jazypty. Men muny amanat dep qabyldadym» degen ol 8 maýsymda Almatyda Aqyt Úlimjiulynyń 150 jyldyǵyna oraı úlken konferensııa ótetinin, sol kúni osy qoıylym jurtshylyq nazaryna usynylatynyn jetkizdi. Týyndy rejısseri «Túrksoıdyń» bas hatshysy Dúısen Qaseıinovke qoıylymdy túrki memleketterine kórsetý jóninde de usynys aıtylǵanyn tilge tıek etti.
Azamat QASYM,
«Egemen Qazaqstan»
О́SKEMEN
