Sýret: instagram.com/qazaqconcert/
Jıynda Konstıtýsııanyń jańa jobasy talqylandy. Usynylǵan ózgerister quqyqtyq memleketti odan ári nyǵaıtýǵa jáne adamnyń quqyqtary men bostandyqtaryna kepildikterdi keńeıtýge baǵyttalǵan. Kezdesýge qatysýshylar reformanyń qundylyqtyq jáne gýmanıtarlyq qyrlaryna nazar aýdaryp, jańa normalardyń qoǵamdyq sanaǵa áseri jaıynda oı bólisti.
– Aldyńǵy kezekte Ata zańnyń jańa mátininde bilim men ǵylymǵa, tarıhı-mádenı murany saqtaý, tól mádenıetti qoldaý, mádenıet pen ınnovasııaǵa basymdyq berilgeni kóńil qýantady. Bul 3-baptyń 1-tarmaǵynda aıqyn jazylady. Odan bólek 40-bapta Qazaqstan Respýblıkasynyń azamattary tarıhı jáne mádenı muranyń saqtalýyna qamqor bolýǵa, tarıh pen mádenıet eskertkishterine uqypty qaraýǵa mindetti ekeni aıtylǵan. Sebebi elimizdiń bolashaǵy adam kapıtalyna, azamattardyń bilimi men jetistikterine negizdeletinin kórsetedi. Mundaı baǵyt jastardyń áleýetin ashýǵa, shyǵarmashylyq pen zııatkerlik damýdy qoldaýǵa jol ashady, – dep atap ótti Roza Baǵlanova atyndaǵy «Qazaqkonsert» memlekettik akademııalyq konserttik uıymynyń dırektory Aqan Ábdýálıev.
Jıynda sóz alǵan Qazaqstannyń eńbek sińirgen qaıratkeri Janǵalı Júzbaı óner adamdarynyń shyǵarmashylyǵyna qoldaý kórsetý jóninde óz oıyn ortaǵa saldy.
– Qazir ónerdiń barlyq salasy jan-jaqty damyp jatyr. Atap aıtqanda, ulttyq óner, klassıkalyq óner, estrada óneri, qazaq bı óneri, hor óneri, kıno jáne teatr óneriniń damýyn atap ótýge bolady. Mysaly, «Qazaqkonsert» uıymyndaǵy «Halyq qazynasy» ulttyq óner ortalyǵynda halyqtyń áni, jyry, kúıi men dastany keńinen qamtylǵan. Demek, ortalyqtyń negizgi mindeti – Konstıtýsııada kórsetilgendeı, tarıhı-mádenı murany saqtaý jáne tól mádenıetti qoldaý qyzmetin atqarý. Budan bólek jańa reformalar ultymyzdyń mádenıeti, mentalıteti jáne áleýmettik máselelerdiń damýyna, sondaı-aq qoǵamnyń bilim deńgeıi men zııatkerlik áleýetiniń artýyna yqpal etedi, – dedi ol.
Al Qazaqstannyń eńbek sińirgen qaıratkeri, Erkeǵalı Rahmadıev atyndaǵy Memlekettik akademııalyq fılarmonııa kameralyq horynyń bas dırıjeri Gúlmıra Quttybadamova qazir naq ózgeris qajet kezeńde turǵanymyzdy aıtady.
– Qazir biz tez ózgerip jatqan álemde ómir súrip jatyrmyz. Onyń ústine, sıfrlandyrý oılaý júıemiz ben sanamyzdy túbegeıli ózgertip, óz yqpalyn tıgizýde. Ýaqyttyń osy shynaıy talaptary men syn-qaterleri, sózsiz, ózgerister men jańarýlardyń qajettiligin alǵa tartady. Konstıtýsııa jobasymen muqııat tanysyp shyqtym. Bilim berý men tárbıeleý júıesiniń zaıyrly sıpaty bólek atap kórsetilgen. Sondaı-aq
zııatkerlik menshikti qorǵaý týraly erejeni mańyzdy dep sanaımyn: Konstıtýsııa deńgeıinde memlekettiń azamattardyń zııatkerlik quqyqtaryn qorǵaýdy óz mindetine alatyny bekitilgen. Bul – mádenıet pen shyǵarmashylyqtyń damýyna jańa múmkindikter ashyp, erkin shyǵarmashylyqpen aınalysýǵa jaǵdaı jasaıtyn asa mańyzdy qadam, – dedi G.Quttybadamova.
Sondaı-aq is-sharaǵa qatysýshylar eldiń uzaqmerzimdi jańǵyrýy konteksinde aldaǵy ózgeristerdiń mańyzyna toqtaldy. Olar mádenıet pen ónerdiń qoǵam ómirindegi rólin kúsheıtetin tetikterdi egjeı-tegjeıli qarastyryp, azamattardyń quqyqtyq sanasyn qalyptastyrýda sol mádenıet pen ónerdiń qalaı kómektesetini jóninde pikir bildirdi.
Kezdesýde shyǵarmashylyq bastamalardy odan ári qoldaýǵa qatysty usynystar tyńdaldy. Mádenıet salasynyń ókilderi jańartylǵan Konstıtýsııanyń talanttardy ashýǵa jáne ulttyq murany qorǵaýǵa berik negiz qalyptastyratynyn jáne ulttyń ıntellektýaldy áleýetin damytý úshin sheshýshi shart ekenine basa nazar aýdardy. Atalǵan jıynǵa mádenıet jáne óner salasynyń ókilderi jáne «Qazaqkonserttiń» shyǵarmashylyq ujymdarynyń kórkemdik jetekshileri qatysty.
