Parlament Senatynyń Tóraǵasy Qasym-Jomart Toqaev óziniń kirispe sózinde elimizdi ilgeriletýge baǵyttalǵan baǵdarlamalardyń tabysty júzege asýy bank júıesiniń tıimdi jumysymen tyǵyz baılanysty ekenin atap ótti. Degenmen, Senat basshysynyń aıtýynsha, «búgingi kúnniń ózinde bank menedjmenti kúrdeli ózgeristerdiń qysymyna tótep bere almaı, jańa qarjylyq dáýirdiń talaptaryna saı deńgeıin kórsete almaǵany ókinishti». Bul óz kezeginde ekonomıkalyq júıeniń turaqtylyǵyna teris áser etip, halyqtyń qarjy ınstıtýttaryna degen senimin álsirete tústi.
Q.Toqaev Memleket basshysynyń qańtar aıyndaǵy Joldaýynda qarjy sektoryna serpilis qajet ekenin atap kórsetkenin eske saldy. Elimizdiń qarjy júıesin retteıtin negizgi qurylym – Ulttyq banktiń aldyna ekinshi deńgeıdegi bank júıesiniń jumysyn qadaǵalaýmen qatar, bank portfeliniń jaǵdaıyn saýyqtyrý men berilgen ıpotekalyq qaryzdar máselesin sheshý mindeti qoıyldy. Sonymen qatar, Prezıdent bankterdiń portfelderin «nashar» nesıelerden tazartyp, bankterden qarajatty shyǵarýdy toqtatý jóninde óte oryndy talap qoıdy.
Elimizdiń bank sektoryn memlekettik qoldaý týraly aıta kelip, Senat Tóraǵasy ýaqtyly qabyldanǵan sharalar nátıjesinde bank salasyndaǵy jaǵdaı birshama turaqtalyp, zańdy jáne jeke tulǵalar salymdarynyń saqtalýyn qamtamasyz etýge múmkindik jasalǵanyn atap ótti. Q.Toqaev bul rette, memlekettik qarjy resýrstarynyń esebinen múmkindigi tómen bankterge qoldaý kórsetý jónindegi májbúrli sharalardyń sońy osy bolaryna úmit artty. «Mundaı saıasat keıbir bankterdiń memlekettiń qoldaýyna ıek artyp, qarjy salasyndaǵy ádiletti básekelestiktiń burmalanýyna jol berýmen qatar, bank sektory jumysynyń turaqtylyǵy men bedeline teris áser etedi», - dedi ol.
Q.Toqaev Ulttyq Bankini qarjy júıesindegi táýekelder men osy saladaǵy paıda bolýy múmkin qurylymdyq túıtkilderge aldyn ala baǵa bere otyryp, bank salasynda yqtımal qaýip-qaterlerdi basqarýdyń utymdy modelin qalyptastyrýǵa shaqyrdy. «Bank júıesiniń qarjylyq turaqtylyǵyna kedergi keltiretin álsiz tustardy aldyn ala anyqtaýǵa basymdyq berýimiz qajet. Bul qarjy salasyn retteý men qadaǵalaý júıesin zańnamalyq turǵydan odan ári jetildire túsýdi talap etedi», - dedi ol. Parlament óz kezeginde Ulttyq banktiń qarjy salasyn retteý men qadaǵalaýdy odan ári jetildirý jónindegi bastamalaryn qoldaýǵa daıyn.
Parlament joǵarǵy Palatasynyń basshysy tıisti zańdarǵa túzetýler engizý arqyly ekinshi deńgeıdegi bankterdiń ıeleri men aksıonerleriniń jaýapkershiligin arttyryp, bank aksıonerlerine jáne olarmen baılanysy bar tulǵalarǵa nesıe berýge zańmen shekteý qoıý kerek. Bul óz kezeginde bank aktıvterin shyǵaryp áketýge tosqaýyl qoıatyn bolady.
Q.Toqaevtyń pikirinshe, halyqtyń qarjylyq saýattylyǵyn arttyrý jumysyn jetildirý mańyzdy bolyp otyr, óıtkeni, qarapaıym tildegi qarjy salasyndaǵy aqparattyń jetispeýshiligi azamattar tarapynan tıimsiz sheshim qabyldaýǵa ákep soqtyrýda. Qarjylyq qyzmetter túriniń kóbeıýi, olardyń kún sanap kúrdelenýi, alaıaqtyq tásilderdiń, qarjy pıramıdalarynyń óris alýy kezinde bul sharalardyń mańyzy zor.
Ulttyq bankiniń tóraǵasy Danııar Aqyshev senatorlar aldynda baıandama jasap, bank sektorynyń qyzmetin jetildirý maqsatynda qarjy retteýshisi júzege asyrǵan sharalar týraly jan-jaqty habardar etti.
Sharaǵa qatysýshylar aldynda ulttyq ekonomıka mınıstri Tımýr Súleımenov, «Atameken» ulttyq kásipkerler palatasy basqarma tóraǵasynyń orynbasary, Qazaqstan qarjygerler assosıasııasyny keńesi tóraǵasynyń mindetin atqarýshy Iýlııa Iаkýpbaeva, Eýropa Qaıta qurý jáne Damý Bankiniń Qazaqstandaǵy keńsesiniń Agrıs Preımanıs, Strategııalyq bastamalar ortalyǵynyń aǵa áriptesi Oljas Qudaıbergenov sóz sóıledi.
Pikirsaıysqa Senat depýtattary Birǵanym Áıtimova, Muhtar Jumaǵazıev, Serik Jaqsybekov, Dáýren Ádilbekov, Baqtybaı Shelpekov, Narıman Tóreǵalıev, Ǵumar Dúısembaev, Májilis depýtaty Omarhan О́ksikbaev qatysty.
Talqylaýdy qorytyndylaı kelip, Senattyń Qarjy jáne bıýdjet komıtetiniń tóraǵasy Olga Perepechına parlamenttik tyńdaý qarjy sektoryn «qaıta jańǵyrtý» týraly Memleket basshysynyń tapsyrmasyn iske asyrýǵa úles bolýy tıis ekenin atap ótti. Múddelilik turǵysyndaǵy talqylaý barysynda uzaq merzimdi ótimdi bolýǵa zárýlik, aktıvterdiń sapasyna, qorlandyrý men nesıeleý arasyndaǵy alshaqtyq, bıznestiń qarjylandyrýǵa balama tańdaýdyń azdyǵy, qabyldanǵan sharalardyń retteýshilik yqpalyna taldaýdyń joqtyǵyny qatysty ózekti máseleler belgilendi. Bul máselelerdi sheshý, O. Perepechına aıtqandaı, usynymdar jobasynda kórinis taýyp otyr. Ol usynystar áli de pysyqtalyp, tıisti memlekettik organdarǵa jiberiletin bolady.
