Bıylǵy 1998-2001 jyly týylǵan jastar arasyndaǵy týrnır United World Wrestlinga (Birikken kúres álemi) halyqaralyq kúres federasııasy uıymynyń jyldyq josparyna resmı túrde eńgizildi. Týrnırge 15-ten astam sheteldik komandalar qatysady dep josparlanǵan, qazirgi tańda Ýkraına, Grýzııa, Armenııa, Tájikstan, О́zbekstan, Túrikmenstan, Qyrǵyzstan memleketteri nıet bildirse, Reseı, Iran, Azerbaıdjan, Belorýsııa t.b. komandalar usynystaryn qarastyrýda.
Halyqaralyq «Birikken kúres álemi» (UWW) federasııasynyń talaptaryna sáıkes ótkiziletin týrnırge qadirli qonaqtar, tanymal sportshylar mártebeli qonaq retinde qatyspaq.
Halyqaralyq sanattaǵy tóreshileri júrgizetin týrnırde 55, 60, 63, 67, 72, 77, 82, 87, 97, 130 kg. salmaq dárejelerindegi palýandar kúsh synasady. Alamanda
Mańǵystaý oblysynyń namysyn 5 sportshy qorǵaıdy. Tórt sportshy oblystyq komandadan kúresse, bir sportshy Qazaqstan Respýblıkasy qurama komandasynyń qatarynda kúresedi.
Týrnırdiń jeńimpazdary men júldegerleri jáne jeńimpazdardyń jattyqtyrýshylary medal, dıplom, estelik syılyqtarmen marapattalady. Sonymen qatar, uıymdastyrý alqasynyń bekitýimen, 1 orynǵa 1 000 $; 2 orynǵa 700 $;3 orynǵa 500 $ júlde, jeńimpazdy daıyndaǵan jattyqtyrýshyǵa 500 $ júlde berilmek.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
