Jambyl oblystyq qazaq drama teatrynda «Beý, qyzdar-aı!» komedııasynyń tusaýkeser qoıylymy boldy. Áýelden ádemi ázilmen bastalyp, ásem ánmen ádiptelgen spektakl aqyn jigit Áýbákir (Mámbet Qojalıev), sýretshi jigit Sultan (Jandar Qyryqbaev) jáne magıstrant jigit Hasenniń (Abzal Dáýletbaqov) ózara áńgimelesýimen bastalady. О́nerli úsh jigit te ómirlik jar izdegen jandar. Biri aqyndyq, biri sýretshilik, endi biri ǵylym jolyna túsken jigitterdiń ómirin ózgertip, kóńilin kórkem kúıge bólegen Aısulý esimdi beıtanys qyz. Kóktóbe kolhozynda saýynshy bolyp isteıtin Aısulýdyń sýreti gazetke basylady. Ádemi qyzdyń sýretin kórgen boıda esi ketken úsh jigit bir-birine aıtpaı Almatydan Aısuldy izdep Kóktóbege attanady.
Árıne arman asqaq, úmit zor. Úsh jigittiń de ańsaǵany aıdaı sulý Aısulý. Al aýyldaǵy saýynshy bolyp isteıtin Aısulý (Almıra Dildá), Kúnsulý (Jadyra Qultaeva), Jansulý (Indıra Mustafaeva) jáne Nursulý (Rızat Qylyshbaeva) beıneleri de tartymdy shyqqan. Biraq qaladan kelgen úsh jigitti baıqaǵan aýyldaǵy sharýashylyq bastyǵy (Ábý Shońbaev) pen polısııa qyzmetkeri (Anar Altybaeva) bir qýlyq qoldanyp, olardy Aısulýmen emes, Kúnsulý, Jansulý, Nursulýlarmen tanystyrady. Árıne, olar da «buıryq» boıynsha jigittermen Aısulý bolyp tanysady. Aqyry Aısulý atyna ılanǵan úsh jigit úsh saýynshy qyzben kóńil jarastyrady. Al Aısulý óziniń súıgen jigiti Serkemen (Beksultan Álekeshov) taǵdyr qosady.
«Beý, qyzdar-aı!» komedııasy ótken ǵasyrda jazylǵan shyǵarma. Alaıda bul qoıylymnyń ereksheligi – qoıylymda búgingi zamannyń basty oqıǵalarynyń kórinis berýi. Qoıylymnyń qoıýshy-rejısseri Rústem Janyamanovtyń rejısserlik sheshimi negizinde oqıǵa barysynda búginde elimizde bastaý alǵan «Dıplommen aýylǵa» baǵdarlamasy kórinis beredi. Sondaı-aq, rejısserdiń sheshimi men akterlardyń sheberligi úndesip, búginde jumysbastylyqpen turmys qurmaı júrgen qyzdardyń jaıyn da ádemi ári astarly ázilmen kórsetip berdi. Al komedııanyń sýretshisi – Jambyl oblystyq qazaq drama teatrynyń bas sýretshisi Rahat Saparalıevanyń eńbegi sahnanyń ón boıynan kórinip turdy.
Hamıt Esaman,
«Egemen Qazaqstan»
Jambyl oblysy
