1941-1945 jyldary Uly Otan soǵysynyń maıdandarynda bizdiń otandastarymyzdyń janqııarlyq erligi men qajyrly eńbegi memleketimizdiń damýynyń, onyń gúldenýi men qaýipsizdiginiń nyq irgetasyn qalyptastyrdy. Dańqty batyrlarymyz, onyń ishinde bizdiń halqymyzdyń batyr qyzdary Álııa Moldaǵulovanyń, Mánshúk Mámetovanyń, Hıýaz Dospanovanyń esimderi qazaqstandyqtardyń esinde jáne álem tarıhynyń betterinde máńgilik qalady.
Qazaqstan Prezıdenti Nursultan Nazarbaevtyń sarabdal saıasatynyń arqasynda áıelder memlekettik bıliktiń joǵary organdarynda jaýapty oryndarda, bizdiń tynys-tirshiligimizdiń ártúrli salalarynda tabysty eńbek etýde, qazaqstandyq armııanyń qatarynda da áskerı qyzmet atqarýda.
XXI ǵasyrda «áıel – jaýynger», «áıel – ofıser» nemese «áıel – sarbaz» degen túsinikter eshkimdi tańǵaldyrmaıdy, tek qana qyzyǵýshylyq pen maqtanysh sezimderin týdyrady.
Bolmysynan názik áıelder qaýymy búginde Qarýly Kúshter qatarynda kóptep sanalady, aldaryna qoıylǵan mindetterdi oıdaǵydaı oryndap júr jáne áskerı mamandyqty meńgerý arqyly áskerı mansapty tabysty qurý perspektıvasyna ıe boldy.
Búgin Otanymyzdyń qorǵanysynda saıypqyran jigittermen qatar barlaýshy, desantshy, ushqysh, parashıýtshi, baılanysshy qyzdar tur. Olardyń kópshiligi úshin kamýflıaj, polıgon jáne atys – kúndelikti sińisti uǵym. Qazir 7900-den astam áıel áskerı qyzmetshi ártúrli áskerı garnızondarda qyzmet ótkerýde.
Máselen, Qazaqstan Respýblıkasynyń Qarýly Kúshterinde alǵashqy ret aǵa ushqysh – avıasııalyq eskadrılıa avıasııalyq býynynyń nusqaýshysy laýazymyna leıtenant Ardana Botaı taǵaıyndaldy, ol jaýyngerlik ushaqty kásibı túrde basqarýda has sheberdiń ózi.
Áskerı-teńiz kúshterinde jaýyngerlik qurbylar – bas starshına Janar Ybyraeva jáne aǵa matros Darıa Kırıchenkolar áskerı qyzmetti erlerden qalyspaı atqaryp, áskerı korabl ekıpajynyń quramynda tapsyrmalardy múltiksiz oryndaıtyndyǵymen erekshelenedi.
Áıel áskerı qyzmetshilerdiń álemdik deńgeıde Qazaqstannyń ımıdji men bedelin nyǵaıtýǵa qosqan úlesterin de atap ótken jón. Jyl saıyn bizdiń armııamyzdyń názik ókilderi erlermen qatar ártúrli halyqaralyq jarystar men oqý-jattyǵýlarǵa belsendi túrde qatysýda.
Osylaısha 2017 jyly «Ońtústik» óńirlik qolbasshylyǵy 66597 áskerı bóliminiń efreıtory Shamshyraq Serjanova «Dostastyq jaýyngeri» dárejesine ıe boldy jáne memlekettik nagrada – «Jaýyngerlik erligi úshin» medalimen nagradtaldy.
Maıor Olga Rypakova – Qarýly Kúshterimizdiń maqtanyshy. Jeńil atletıkadan Olımpıada chempıony, úsh ordenniń ıegeri.
Sondaı-aq áskerı áıelder qazaqstandyq jastardy patrıotızm jáne Otanǵa súıispenshilik rýhynda tárbıeleý isine baǵa jetpes úles qosýda.
Ortalyq ansambl bastyǵynyń orynbasary – Qazaqstan Respýblıkasy Qarýly Kúshteri Ulttyq áskerı-patrıottyq ortalyǵynyń bas baletmeısteri Iаna Chıgarkovanyń kásibı sheberligi men janqııarlyq eńbegi «Jas sarbaz» qozǵalysyna jáne ortalyq bazasynda «Erke» balalar kórkemóner tobynyń jumys isteýine bastama boldy.
Áskerı ujymdarda áskerı qyzmetshilerdiń máselelerin sheshýde, áleýmettik, psıhologııalyq-pedagogıkalyq jumysty uıymdastyrý jáne júrgizý, moraldyq-psıhologııalyq ahýaldy jaqsartýdaǵy negizgi mindetter áskerı bólimder komandırleriniń áıelderi basqaratyn áıelder keńesterine tıesili.
Árbir áskerı bólimshede jaýyngerlik rýhty qoldaý, turaqty moraldyq-psıhologııalyq ahýaldy ornatý jáne otbasy ınstıtýtyn nyǵaıtý – bul memlekettiń áskerı qaýipsizdigin qamtamasyz etýge áıelder qaýymy ókilderiniń qosqan zor úlesi.
Qazaqstannyń áıel áskerı qyzmetshileri rýhymen ǵana myqty emes, olardyń yqylastylyq, qaıyrymdylyq jáne kishipeıildilik sııaqty áıel tabıǵatyna tán qasıetteri áskerı bólimshelerdiń komandırlerine jeke quramnyń arasynda birlik pen salamatty ahýaldy saqtaýda kómektese otyryp, kez kelgen jaǵdaıda árqashan jol tabýǵa múmkindik beredi.
Áskerı qyzmet ótkerý jaǵdaılary qanshalyqty qıyn bolsa da, áıelder kez kelgen jaǵdaıda óziniń súıkimdiligi men áserliligin saqtap qalady.
Búginde ıyǵyna pogon taqqan áıelder áskerı boryshyn erlermen qatar oryndaıtyn jáne el irgesine berik qorǵan bola alatyn, sonymen qatar otbasy qundylyqtaryn tý etetin bilikti áskerı qyzmetkerler sanatynda.
Talǵat MUHTAROV,
Qorǵanys mınıstriniń orynbasary, general-leıtenant
