О́mirin óz qolymen qıǵan jeti balanyń tórteýiniń ólimine jaýapsyz mahabbat sebep bolsa, bireýi ata-anasymen janjaldan keıin osyndaı qatygez tirlikke barǵan. Altynshy balanyń ólimine sebepker bolǵan jaǵdaı áli tekserilip jatyr. Al jetinshi oqıǵa kúni keshe ǵana, ıaǵnı komıssııa otyrysy bolǵan kúni keshke qaraı boldy. On bes jasar qyz toǵyzynshy qabattan sekirip ketken.
Oblystyq bilim basqarmasy dırektorynyń orynbasary Gúlnár Ýkınanyń málimetinshe, oblys óńirinde 2017 jyly 10 jasóspirim ózine qol jumsaǵan. 33 bala da osyndaı qaterge barǵysy kelgen. Sońǵy eki jylda jasóspirimder arasynda bolatyn sýısıd 3 oqıǵaǵa kóbeıgen, óz ómirin qııýǵa talap jasaǵandardyń sany da beseýge artqan. 2018 jyly 14 bala sýısıdke umtylǵan. Sonyń 9-y mektep oqýshylary da, beseýi kolledjde oqıtyn stýdent eken.
«Osy málimetter oblysta sýısıdke qarsy jumystardyń atústi júretindigin bildiredi. Qalyptasyp otyrǵan jaǵdaıǵa qaraı psıhologııalyq jumystar júrgizilýi tıis ekendigi neshe ret aıtylyp keledi. Jergilikti jerlerde psıhologııalyq qyzmet kórsetilýin qamtamasyz etý úshin barlyq bilim bólimderinde pedagog-psıholog birligi ashyldy. Oblysta osy maqsatpen psıhologtar qatary 42-ge kóbeıdi» dedi Gúlnár Kóshkenova. Biraq ol Rýdnyı, Qarabalyq, Denısov pen Qostanaı aýdandarynda psıhologtar jumysy kóńil kónshitpeıtinin, olarda sýısıd jónindegi leksııalar jalpy aıtyla salatynyn jasyrǵan joq. Jyl basynan beri Rýdnyı qalasynda eki bala sýısıd jasamaq bolǵan. Rýdnyı qalasy ákiminiń orynbasary Elena Skaredına qaladaǵy 30 mektepte psıholog jumys isteıtinin, biraq olardyń 64 paıyzynyń tájirıbesi 5 jyldan aspaıtynyn tilge tıek etti. Bıyl qala ákimi psıhologtarmen sýısıdtiń aldyn alý týraly jumys júrgizetin bilikti, tájirıbeli psıhologtar shaqyrý úshin 800 000 teńge qosymsha qarjy bólýge sheshim shyǵarǵan.
Komıssııanyń keńeıtilgen otyrysynda sýısıdtiń aldyn alý týraly kóptegen máseleler, aýdandar men qalalarda júrip jatqan jumystar jóninde aıtyldy. Oblys ákiminiń orynbasary Marat Júndibaev jalpy óńirde jasóspirimder arasynda bolatyn sýısıdke qarsy 5-6 tarmaqtan turatyn jumys josparyn jasaýǵa usynys aıtty. Osy jospar jasalǵannan keıin oblysta jasóspirimder sýısıdiniń aldyn alý jumystarymen aınalysatyn jumys toby qurylatyn bolady.
Názıra JÁRIMBET,
«Egemen Qazaqstan
