Batyrdyń rýhyna qurmet kórsetildi

Sebebi, 1914 jyly patshalyq Reseı de dúnıejúzilik soǵysqa kirgen edi. Bul alapat azapty  aıqas barlyq elge, onyń ishin­de Qazaqstanǵa da aýyr zardabyn tıgizdi. Ásirese 1916 jyl­ǵy 25 maýsymdaǵy armııanyń qara jumysyna 19 ben 43 jas ara­lyǵyndaǵy qazaqtardy alý týraly aq patshanyń jarlyǵynan soń, ár-ár jerde kóterilis oty burq ete qaldy. Sol kezderi Shúkitaı aqynnyń:

Shamalǵannyń aýylym

jaǵasynda,

Kim jetedi asyldyń baǵasyna?

Ardaqty aǵa sen ediń,

er Bekbolat,

Tulpar minip, el bastap

barasyń ba! –

dep jyrlaǵanyndaı, Bekbolat batyr Jaıylmys bolysyndaǵy el-jurtty tyl jumystaryna adam bermeýge shaqyryp, patsha jarlyǵyn oryndamaýǵa úndeıdi, ózi sııaqty qaıyspaı qarsy tur­ǵan­dardyń basynda bolady.

Alaıda muzdaı qarýlanǵan jazalaýshy otrıadtyń tegeýrinine tótep bere almaı, kóterilisshiler jeńilis taýyp, Bekbolat bar­lyq kináni moınyna alyp, ózi qolǵa túsedi.1916 jylǵy 7 qyr­kúıekte Vernyı qalalyq áske­rı garnızonynyń soty ony ólim jazasyna kesý týraly úkim shy­ǵarady. Sóıtip Boraldaı asýynda jurttyń kóz aldynda darǵa asylady!..

Elin oılaǵan esil er osylaısha  kóz jumdy. Eń sońǵy demi bitkenshe ózin bıik ustady, jaý aldynda keshirim surap búrispedi, búgilmedi, ajaldy qasqaıyp turyp qarsy aldy.

2000 jyly Hamza qajy Ekeı­baevtyń jáne búginde jasy 99-ǵa tolǵan soǵys ardageri Úsenbaı Tastanbekovtiń bastamasymen 1 Maı aýylyna Bekbolat esimi berilgen. Al jýyrda osy eldi mekende ortasyndaǵy granıt tuǵyrda batyr beınesi bederlengen Bekbolat Áshekeev atyndaǵy saıabaq ashyldy.

Ol Elbasynyń «Rýhanı jań­ǵyrý» baǵdarlamasy aıasynda ári kópshiliktiń usynys-tilegin iske asyrý maqsatynda júıeli júzege asqan, aýdan ákimi Mahabbat Bıgeldıev bastaǵan, zııaly qaýym qostaǵan, búkil qara­saılyqtardy qatty rıza etken óte ıgilikti ju­mys edi. Bul úshin «Týǵan jerge týyńdy tik» qoǵamdyq qory (dırektory Saǵyn­dyq Jylqybaev) qurylyp, aýdan jurtshylyǵy da óz úlesin qosqan-dy.

Eskertkish lentasyn oblys ákiminiń  birinshi orynbasary Laz­zat Turlashov, memleket jáne qoǵam qaıratkeri Shámsha Ber­kimbaeva, Elbasynyń synyptasy Edige Júnisbekov, aýdan ákimi Ma­habbat Bıgeldıev qıdy. Ashyq aspan  astynda aq das­tarqan jaıy­lyp, quran oqyl­dy. Aıtpaqshy aldymen jınal­ǵandar aldynda belgili jazýshy Naǵa­shybek Qa­palbekov Bekbolat Áshekeev týra­ly maz­mundy baıandama jasady.

Sonymen qazaqtyń qaharman ulynyń biri, halyq batyrynyń rýhyna úlken qurmet kórsetildi.

Berikbaı QADYQOV,

jýrnalıst

Almaty oblysy,

Qarasaı aýdany

Sýretti túsirgen Erlan ÁLIASQAROV