«Ál-Áhlı» – eń kóp júlde alǵan komanda
Fýtbol týraly jazatyn Goal basylymy álemde eń kóp júlde jeńip alǵan komandalardyń reıtıngin shyǵardy. Bir qyzyǵy, alǵashqy TOP-5 komandanyń ishinde «Real», «Barselona», «Bavarııa» sekildi grand komandalar joq.
Basylymnyń reıtıngi boıynsha, tizimdi 117 júldesi bar Mysyrdyń «Ál-Áhlı» klýby bastaǵan (Mysyrda – 93, álem boıynsha 24 júlde alǵan). Ekinshi oryndaǵy Shotlandııanyń «Reındjers» komandasynda 115 júlde bar (Shotlandııada – 114, álem boıynsha – 1). Úzdik úshtikti Ýrýgvaıdyń «Nasonal» klýby 111 júldemen túıindedi (Ýrýgvaıda – 102, álem boıynsha – 9).
Al Ispanııanyń eki úzdik komandasy «Barselona» men «Real» klýbtary altynshy jáne jetinshi orynǵa turaqtaǵan. Katalonııalyqtar enshisinde 89 (72+17), Madrıd klýbynyń qorjynynda 88 (64+24) kýbok bar.
Bir jylda 32 jekpe-jek uıymdastyrady
Matchroom Boxing promoýterlik kompanııasy sandyq medıa salasynyń alyby Perform Group kompanııasymen bir mıllıard dollar kólemindegi kelisimshartqa otyrdy.
Kelisimshart boıynsha Matchroom Boxing promoýterlik kompanııasy bir jyldyń ishinde 32 boks keshin uıymdastyrýy kerek. Sonymen qatar bul jekpe-jekter Perform Group seriktesiniń usynysy boıynsha DAZN qyzmeti arqyly tikeleı efırde kórsetiletin bolady. Matchroom Boxing pen Perform Group arasyndaǵy seriktestik 8 jylǵa josparlanǵan.
Sondaı-aq 32 boks keshiniń 16 jekpe-jegi AQSh-ta, dál sondaı boks keshi Brıtanııada ótýi kerek. Bir aıta keterligi, Matchroom Boxing kompanııasy uıymdastyrǵan boks keshin jankúıerleri pay-per-view júıesi (aqyly kórsetilim) arqyly kórmeıdi. Onyń ornyna aı saıynǵy jazylymǵa tapsyrys bere alady.
Aıta keteıik, otandasymyz Danııar Eleýsinov (1-0, 1 KO) dál osy Matchroom Boxing promoýterlik kompanııasynyń ókili sanalady.
Arda Turan 16 oıynǵa shettetildi
«Ystanbul» komandasynyń jartylaı qorǵaýshysy Arda Turan óreskel tártip buzǵany úshin ony Túrkııa fýtbol federasııasynyń tártiptik komıteti 16 oıynǵa shettetti.
Túrkııa lıgasynyń 32-týr oıynynda «Ystanbul» men «Sıvasspor» komandalary kezdesip, matchtyń 94-mınýtynda «Sıvasspor» komandasynyń oıynshysy tártip buzǵan. Alaıda tóreshi oıyn erejesi buzylǵan joq dep eseptegen. Al Turan tártip buzyldy dep, qaptaldaǵy tóreshige daýys kóterip, qolymen ıterip jibergen.
Sol sátte tóreshi Turanǵa qyzyl qaǵaz kórsetip, oıynnan shettetken. Osylaısha, tártiptik komıtettiń sheshimimen 16 oıynǵa shettetilgen ol Túrkııa lıgasynyń osy jyldaǵy eki oıynyna, kelesi jylǵy 14 matchyna qatyspaıdy.
Daıyndaǵan Álı BITО́RE,
«Egemen Qazaqstan»
