Ulytaý aýdany ákiminiń orynbasary Baǵdat Baıjantaevtyń aıtýynsha, byltyrǵy jyly ótken «Ulytaý qymyzy» etnofestıvali men bıylǵy «Kókmaısa» osy aýdannyń týrıstik áleýetin arttyrý maqsatynda ótkizilip otyr. Sonymen qatar bul sharalar aýdan kóleminde bes jyldan beri ótkizilip kele jatqan, qazaqtyń «bıe baılaý», «aıǵyr qosý», «qymyzmuryndyq» sııaqty ulttyq dástúrlerin dáripteıtin «Terisaqqan kóktemi» etnofestıvaliniń bir bóligi deýge bolady. Atalǵan dástúrler materıaldyq emes mádenı mura elementteriniń ulttyq tizimine engen.
«Kókmaısada» aqshańqan kıiz úıler boı kóterip, ájeptáýir jármeńke uıymdastyryldy. Jergilikti halyq óz qolymen jasaǵan qymyzy men qaımaǵyn, qurty men maıyn, eti men sútin saýdalap, bir jasap qaldy.
Ásirese syrttan kelgen qonaqtarǵa bári tańsyq – kópshilik atqa minip, qaıyqpen serýendep, altybaqan teýip, tamasha saýyqqa keneldi. Ulytaýdyń qasıetti taýlaryn jaıaý-jalpy aralaǵan jurttyń da qarasy kóp. Joshy han men Alasha han kesenelerine bir kúndik sapar uıymdastyrylyp, birneshe top Terekti áýlıeniń basyna, Altynshoqyǵa táý ete bardy.
Sharanyń bir maqsaty – atakásipti jarnamalap, jergilikti kásipkerler men qolóner sheberlerine qoldaý kórsetý. Festıval aıasynda aspazdyq óner baıqaýlary, aǵash óńdeýden, qamshy órý men arqan esýden sheberlik sabaqtary, sazgerlik pen ulttyq ánderdiń, bı óneriniń baıqaýlary uıymdastyryldy. Álbette, ulttyq oıyndar men sporttyq saıystar da az bolǵan joq.
Qyzyq-dýmanǵa toly «Kókmaısa» etnofestıvalin uıymdastyrýshylar ony budan bylaı jyl saıyn ótkizip otyrmaqshy. Dástúrli «Terisaqqan kóktemi» óńirge kelgen sheteldik qonaqtardyń qaı-qaısysynyń da kóńilinen shyqqan, halyqaralyq IýNESKO men ISESKO (Bilim, ǵylym jáne mádenıet máseleleri jónindegi ıslam uıymy) uıymdaryn da qyzyqtyryp otyr. Etnofestıval barysynda ótetin ulttyq salt-dástúr kórinisteri men qazaqtyń as máziri, baı dastarqany eshkimdi tańdandyrmaı, tamsandyrmaı qoımaıdy. Barǵan saıyn molyǵa túsken etnofestıval – qazaq jerine týrıster tartýdyń asa bir tıimdi de utymdy joly. Sondyqtan uıymdastyrýshylarǵa aıtar alǵysymyz mol.
Qaırat ÁBILDA,
«Egemen Qazaqstan»
Qaraǵandy oblysy,
Ulytaý aýdany
