Osy jyldar bederinde quramynda 15-ke jýyq aqjaýlyqty áje bar ujym halyqtyq, dástúrli án óneriniń damýyna ólsheýsiz úles qosyp, ádet-ǵuryptarymyz ben salt-dástúrlerimizdiń keń qanat jaıýyna da uıytqy bolyp keledi. Repertýarda Birjan sal, Aqan seri, Úkili Ybyraıdan bastap qazirgi qazaq kompozıtorlarynyń qulaq quryshyn qandyratyn, tyńdaýshylarǵa erekshe lázzat syılaıtyn 60-tan astam áýezdi ánderi toptasqan. Aralarynda kóp shyrqala bermeıtin týyndylar az emes.
– M.Jumabaev atyndaǵy kolledjde otyz jylǵa jýyq ustazdyq qyzmet ettim. Zeınetke shyqqannan keıin ónerge beıimdi zamandastarymnyń basyn qosyp, ata-babalarymyzdyń tálim-tárbıelerin nege ulyqtamasqa degen oı keldi. Sodan beri jurtshylyq nazaryna taǵylymdy keshter usynýdy basty murat etip kelemiz. «Rýhanı jańǵyrý» baǵdarlamasy aıasynda shyǵarmashylyq joba ázirlep, Reseıdiń qazaqtar qonys etken aımaqtarynda bolyp qaıttyq. Birde-bir shaqyrýdan qalǵan emespiz. Jamal Tekebaeva, Sapýra Zaıkına, Ásııa Qarabalına, Shárbaný Jaqsylyqova, Álııa Maldybaeva, Baqytjan Baltabaeva, taǵy basqalary ujymnyń belsendi músheleri sanalady, – deıdi ansambldiń uıymdastyrýshysy ári kórkemdik jetekshisi Mashýda Ybyraeva ótkennen syr shertip.
О́mirlerin ánmen órnektep júrgen jeztańdaı ánshi ájelerdiń ónerdegi joly jýyrda aıryqsha áspettelip, aımaq basshysynyń alǵys hatymen marapattaldy. Ardagerler keńesi syı-qurmet kórsetti. «Elge sálem», «Kózińniń móldirin-aı», «Neni oıladyń?», «Aıaýlym, armanymdaı asylym eń», taǵy basqa tamasha ánder óz naqyshymen shyrqalyp, ádemi keshke ulasty.
О́mir ESQALI,
«Egemen Qazaqstan»
Soltústik Qazaqstan oblysy
Sýretti túsirgen Talǵat TÁNIBAEV
