Áýezov teatrynyń jyl saıynǵy dástúrli jazǵy gastroli bıyl Batys Qazaqstan oblysynan bastaldy. Ǵasyrǵa jýyq tarıhy bar óner ujymynyń D.Temirsultanova, D.Aqmolda, A.Satybaldy sekildi tanymal ónerpazdary I.Saparbaıdyń «Syǵan serenadasy», M.Omarovanyń «Aqtastaǵy Ahıko», R.Otarbaevtyń «Beıbarys sultan», Ǵ.Esimniń «Tańsulý», A.Volodınniń (aýdarǵan A.Maemırov) «Qoshtasqym kelmeıdi...» qoıylymdaryn sahnalady.
Bir ereksheligi, bul joly Áýezov teatry teatr janyndaǵy mýzeı qorynan qyzyqty jádigerler ákelip, kóshpeli kórme de uıymdastyrypty. Jarty ǵasyrlyq tarıhy bar teatr mýzeıinde alǵashqy teatr ártisteriniń kıimderi men fotosýretteri, afıshalary, baǵdarlamalary, ómirden ozǵan teatr artısteriniń ómirbaıandary, jeke materıaldary, qoljazbalary, alǵan syılyqtary saqtalǵan. Teatr mýzeıiniń jetekshisi Nargız Asanjanova oraldyqtarǵa árbir jádigerdiń tarıhyn áserli áńgimelep berdi.
- «Rýhanı jańǵyrý» baǵdarlamasy aıasynda teatr gastroli óńirlerde budan bylaı da jalǵasady. Buǵan qosa bizdiń teatr bıyl Fransııada ótetin dúnıejúzilik «Avenıý» teatr festıvaline Qazaqstannan tuńǵysh ret qatysaıyn dep otyr. Biz bul dodaǵa aqyn-dramatýrg, Memlekettik syılyqtyń ıegeri Iran-Ǵaıyptyń (Iranbek Orazbaev) «Qorqyt» dramasyn ázirlep jatyrmyz, - deıdi óner ujymynyń bolashaq josparlarymen bólisken teatr dırektory, Qazaqstannyń eńbek sińirgen qaıratkeri Ashat Maemırov.
Almatylyq óner ujymynyń gastroldik sapary jeksenbi kúni R.Otarbaevtyń «Beıbarys Sultan» tarıh drama qoıylymymen aıaqtaldy. Beıbarys Sultannyń beınesin akter Azamat Satybaldy oınady. Qorytyndy keshke Qazaqstannyń Eńbek Eri, KSRO Halyq artısi, SSSR, QazSSR Memlekettik syılyqtarynyń laýreaty Asanáli Áshimov, QR halyq ártisi Esmuqan Obaev qatysyp, tilek bildirdi. Teatr dırektory Ashat Maemırov ár qoıylymdy qushaq jaıa qarsy alǵan kórermen qaýymǵa, teatr artısterin arnaıy qabyldap, qurmet kórsetken oblys basshylaryna alǵysyn aıtty.
Áýezov teatrynyń gastroli Qostanaı oblysynda, Arqalyq qalasynda jalǵaspaq.
Qazbek QUTTYMURATULY
«Egemen Qazaqstan»
Oral qalasy
Sýretti túsirgen Rafhat Halelov
