Al 14 mamyr kúni Astana qalasynda «Jas Otannyń» jańadan saılanǵan Ortalyq Keńesiniń birinshi otyrysynda qorytyndy qujatty iske asyrý boıynsha «Jas Otan» JQ 2021 jylǵa deıingi Jol kartasy qabyldandy. Sondaı-aq, Jastar qanatynyń jańa mýltıjobalary keńes múshelerine, jastar uıymdarynyń kóshbasshylaryna tanystyryldy. Qolǵa alynǵan jobalar jastar arasynda salaýatty minez-qulyq pen ómir salty qaǵıdattaryn engizý, kásipkerliktiń jan-jaqty damýyna yqpal etý, qazaq jáne aǵylshyn tilderin damytýǵa yqpal etetin ortany qalyptastyrý, sıfrly tehnologııalardy engizý jáne damytý úshin jaǵdaı jasaý sekildi maqsattardy kózdeıdi.
Otyrysqa «Jas Otan» JQ Ortalyq keńesiniń 16 aımaqtan 32 múshesi qatysty, onyń ishinde 91 tobynyń ánshisi Dýlat Mýhametqalıev te bar. Qatysýshylar Astana jastary resýrstyq ortalyǵynyń qoldaýymen elordanyń 20-jyldyǵyna arnap aǵash otyrǵyzý dástúrin qoldady.
Otyrys barysynda Keńeske Astana qalasynan saılanǵan Álimqulov Bekjan uıymnyń 18-jyldyǵyna arnaıy syılyq retinde ázirlegen Telegram Bot-ty jumysymen tanystyryp, iske qosty. Endi uıym Telegram júıesinde jastarǵa burynǵydan da jaqynyraq jáne qoljetimdi bolmaq.
Bekjan Álimqulov, jas kásipker, Ortalyq keńes múshesi:
«Búgin Telegramda Jas Otannyń botyn iske qostyq. Qyzyqtyrǵan aqparatqa jyldam qol jetkizýge bolady. Ol uıym týraly basty aqparatty sol mezette beredi. Telegramnyń izdeý bólimine @jasotan_bot dep jazyp, qyzyqtyrǵan aqparatqa suranys tastaısyz, al bot sol sekýndta sizge jaýap qaıtarady. Jas Otandy týǵan kúnimen quttyqtaımyn. Uıymnyń alańynda búgin aıtylǵan jańa jobalardy birge iske asyratyn bolamyz».
Esterińizge sala ketsek, 2008 jyly 14 mamyrda Elbasynyń qoldaýymen uıym qoǵamdyq birlestik retinde resmı tirkeldi. Alaıda «Jas Otannyń» tarıhy bir top belsendi jastardyń qozǵalysy retinde 2000 jyldan bastaý alady jáne qazirgi jastar saıasaty men jastar uıymdarynyń qurylýyna sebepker boldy. Sonymen qatar, Qaraǵandy oblysynan Keńes múshesi Sýndıtalıev Nııaz jańadan qurylatyn múgedekter uıymy jaıly jańalyǵymen bólisti.
Nııaz Sýndıtalıev, Ortalyq keńes múshesi:
«Qaraǵandy jastary meni keńes múshesi bolýǵa laıyq dep sanady. О́te qýanyshtymyn. Meniń belsendi azamattyq ustanymym árdaıym múmkindigi shekteýli jastardyń ómirin jaqsartýǵa baǵyttaldy. Osylaısha múgedekterdiń qoǵamdyq birlestigin qurý týraly oıǵa keldik. Osy aı basynda «Qamqor plus» erekshe qajettiligi bar jandarǵa arnalǵan birlestikti resmı tirkeýge kiristik. Osy bastamaǵa qoldaý bildirgen «Jas Otanǵa» rahmet aıtqym keledi».
Bıyl uıym tarıhynda alǵash ret Ortalyq keńes músheleriniń ashyq onlaın saılaýy ótti. Saılaýǵa qatysqan 363 adamnyń arasynan 16 kóshbasshy eń kóp daýys jınap, óz aımaqtarynyń úzdigi atandy. «Jas Otan» óz tarıhynda alǵash ret uıymnyń Ortalyq keńes múshelerin tańdaýdy jastardyń ózine senip tapsyrdy.
