Nursultan Nazarbaev kezdesý barysynda Vladımır Pýtındi Reseı Federasııasynyń Prezıdenti bolyp saılanýymen taǵy da quttyqtap, jaýapty qyzmetine tabys tiledi.
– Bıylǵy 18 naýryzda tarıhı mańyzy bar oqıǵa boldy. Siz Reseı halqynyń asqaq senimin ıelenip, zor jeńiske jettińiz. Qazirgideı kúrdeli jaǵdaıda mundaı senimniń máni zor, – dedi Qazaqstan Prezıdenti.
Nursultan Nazarbaev Qazaqstan men Reseı arasyndaǵy saýda-ekonomıkalyq, ınvestısııalyq jáne basqa da mańyzdy salalar men baǵyttar boıynsha ekijaqty dostyq pen tyǵyz yntymaqtastyq ornyqqanyna toqtaldy.
– Qazaqstan – Reseımen úlgi bolarlyq qarym-qatynas jáne qarqyndy ekonomıkalyq baılanys ornatqan eń jaqyn memleket. Elderimiz arasyndaǵy taýar aınalymynyń kólemi – 16 mıllıard dollarǵa jýyq. Birlesken kásiporyndar sany artyp keledi, – dedi Qazaqstan Prezıdenti.
Sonymen qatar Memleket basshysy eki el arasyndaǵy joǵary deńgeıdegi ózara yqpaldastyq Qazaqstan-Reseı qatynastarynda týyndaıtyn máselelerdi tıimdi sheshýge septigin tıgizip otyrǵanyn aıtty.
– Qazaqstan árdaıym sizdermen birge. Biz árqashan birge jumys júrgizip, birlese alǵa umtylyp, bul kúrdeli kezeńdi de eńseretin bolamyz. Búginde barlyq baǵyt boıynsha qalypty jumys júrgizilýde. Kórshiles táýelsiz memleketter arasynda árdaıym máseleler týyndap jatady. Bizdiń úkimetterimiz ben mınıstrlikterimiz arasynda tyǵyz qarym-qatynas ornyqqan. Týyndaıtyn máselelerdi dúrliktirmeı, baısaldylyqpen sheshý qajet. Biz – odaqtas eldermiz, eki eldiń buqaralyq aqparat quraldary da osy baǵytta jumys júrgizýi tıis, – dedi Nursultan Nazarbaev.
Reseı Federasııasynyń Prezıdenti eki memleket arasyndaǵy túrli salalar boıynsha ózara tıimdi qarym-qatynas ornyqqanyn aıtyp, onyń oń qarqynmen damyp kele jatqanyna toqtaldy.
Vladımır Pýtın Qazaqstan Reseıdiń strategııalyq odaqtasy ǵana emes, sondaı-aq eń jaqyn ekonomıkalyq seriktesteriniń biri ekenin atap ótti.
– Elderimiz arasyndaǵy qatynastar tabysty ári dáıekti damyp keledi. Byltyr ekonomıkada jaqsy nátıjege qol jetkizdik. Atap aıtqanda taýar aınalymy 30 paıyzǵa ósti. Reseı Qazaqstannyń jetekshi saýda-ekonomıkalyq seriktesteriniń biri bolyp qala bermek. Reseıdiń Qazaqstan ekonomıkasyna bólgen tikeleı ınvestısııasynyń kólemi artqanyn da atap ótkim keledi, – dedi Vladımır Pýtın.
