R.Dálenovtiń aıtýynsha, budan basqa akkredıtasııadan áýejaıdan (Nursultan Nazarbaev áýejaıy), sonymen birge «Marrıot», «Rıksos», «Dýman» otelderi men «Kerýen» saýda-oıyn-saýyq ortalyǵynan da ótýge bolady. Tirkeý jumystary AEF bazasyndaǵy Global Challenges Summit eýrazııalyq kongresiniń sońǵy kúnine deıin jumys jasamaq.
Ulttyq ekonomıka mınıstrliginiń strategııalyq josparlaý jáne taldaý departamenti dırektorynyń orynbasary Baýyrjan Turlybekov forýmǵa qatysýǵa nıet bildirýshilerge akkredıtasııa jasaý úshin eki paket usynylatynyn aıtty. Birinshisi standart paketi, onyń quny 35 myń teńgeni quraıdy. Bul qarajatqa belgili bir paneldik sessııalarǵa qatysý jáne de tamaqtaný kiredi. Ekinshi pakettiń quny 150 myń teńgeni quraıdy. Onda qatysýshy barlyq pikirtalas alańyna emin-erkin kirip, Elbasy qatysatyn plenarlyq otyrysqa da kirý múmkindigine ıe bolady. Uıymdastyrýshylardyń aıtýynsha, paketter qunyna qaramastan keletin qatysýshylar sany 5 myńdy quraıdy degen jospar bar. Osylaısha memleket forým uıymdastyrýǵa jumsaǵan 410 mln teńgeni qaıtaryp alýdy kózdeıdi. AEF-qa tegin kirý múmkindigi tek BAQ-qa berilip otyr. Sharaǵa árisi shetelden, berisi Qazaqstannan 700-ge jýyq tilshi qatyspaq.
Uıymdastyrýshylardyń aıtýynsha, XI Astana ekonomıkalyq forýmynyń negizgi ereksheligi − bul joly úsh kúnge sozylady. Alǵashqy eki kúnde qatysýshylar jahandyq máselelerdi talqylamaq. Al úshinshi kúni negizgi spıkerler alty baǵyt boıynsha Qazaqstan Úkimetimen, sondaı-aq sarapshylarmen birge jumys isteıtin bolady.
«Egemen-aqparat»
