Mamandardyń aıtýynsha, eshki súti anemııada, taǵamdyq allergııa, týberkýlez, asqazan, ishek-qaryn joldarynyń aýrýlarynda, dıabet, dıatez, aǵzanyń qorǵanys qyzmetin arttyrýda, aǵzadan aýyr metaldardyń tuzdary men radıonýklıdterdi shyǵarýda jáne kózdiń nashar kórýinde paıdaly eken. Sondaı-aq, eshki sútinde kalsıı, magnıı, fosfor, marganes, mys, A, V1, S jáne D dárýmenderi men askorbın qyshqyly bar. Sondyqtan da bolar, eshki sútine suranys kóp.
Osyndaı jáıtter eskerile kele, Ońtústik Qazaqstan oblysy Ordabasy aýdanynda táýligine 3 tonna eshki sútin óndirýge jáne 24 tonna sút óńdeýge qaýqarly «Asyl tuqymdy sharýashylyq, Ordabasy eshki sút ónimderi» kooperatıvi quryldy. Jańadan ashylǵan sharýashylyqtyń jumysymen tanysqan oblys ákimi Janseıit Túımebaev eshki sútiniń adam densaýlyǵyna paıdasy mol ekenin aıtyp, atqarylyp jatqan jumystarǵa oń baǵasyn berdi.
Seriktestik tóraǵasy Jeńis Toǵyzaqbaevtyń aıtýynsha, óndiristik kooperatıvtiń iske qosylǵan birinshi kezeńinde saýyn sehy men sút óńdeý zaýytynyń jáne jem-shóp jınaý ǵımaratynyń qurylysy aıaqtalǵan. Jobanyń jalpy quny - 1 mlrd. 829 mln. teńge. Úsh kezeńnen turatyn jospar tolyǵymen oryndalǵannan keıin eshki sany 6 myńǵa jetetin bolady. Zaanen tuqymynyń jergilikti eshkilerden aıyrmashylyǵy – súttiliginde, ıaǵnı kúnine 5-6 lıtr sút beredi. Búginde óndirilgen eshki sútinen aıran, qaımaq, qurt, súzbe jáne ıogýrt ónimi shyǵarylyp jatyr. Kúnine eki márte saýylatyn eshki sútiniń lıtri 500 teńge kóleminde saýdalanýda eken. Aldaǵy ýaqytta kásiporyn Italııa eliniń jańa tehnologııaly qurylǵylaryn ornatyp, saýyn men sút óńdeý prosesin tolyǵymen avtomattandyrýdy, «mosarella» irimshigin shyǵarýdy josparlap otyr.
Erkin DOSYMBAI,
Ońtústik Qazaqstan oblysy.
