Jıynda Muhamedjan Tazabek elimizdiń búgini men bolashaǵy, qazirgi qoǵamnyń bet-beınesi týrasynda keńinen áńgime órbitti. Ulttyq deńgeıde oılaý, memlekettik sanany qalyptastyrý, qazaqy salt-dástúr, ózindik bolmysymyzdy saqtaý syndy qasterli qundylyqtardy dáripteýge úndedi. Keshegi Dýlatı, Balasaǵun, Tóle bılerdi, taý tulǵaly Turar, batyr Baýyrjan, qabyrǵaly qalamgerler Sherhan men Ábishti, uly analarymyz Domalaq, Zere, Uljandy búgingi boıjetkenderge úlgi ete sóıledi.
Tikeleı ınteraktıvti suhbat túrinde júrgizilgen kezdesýdiń ereksheligi jıynǵa qatysýshylardyń árbir saýalyna sol mezette jaýap berýge múmkindik berilgen. Ásirese, jınalǵandardyń bir aýyzdan jazǵan jaýap nusqasy ózge nusqalardan ózgeshelenip, kóleminiń úlkeıip turatyndyǵy kópshiliktiń oı-pikirine saraptama jasaýǵa jaǵdaı jasady. Sonymen qatar, basqosý barysynda túrli onlaın dıagrammalar da nazarǵa usynyldy.
– Qazaq memlekettik qyzdar pedagogıkalyq ýnıversıteti – memleket úshin asa mańyzdy strategııalyq obekt. О́ıtkeni, el úshin ulttyń anasy, jurttyń uıytqysy bolǵan qyz balanyń taǵdyrynan artyq qundylyq joq. Búgin osy ýnıversıtettiń syrtqy tazalyǵynan bastap ishki tártibine deıin tánti bolyp, tańdaı qaqtym. Shynynda, Gaýhar Tóremuratqyzy bastaǵan oqý ornynyń basshylyǵy qyz balalardyń tálim-tárbıesine asa den qoıyp, baıypty bilimi men ózine laıyqty qylyǵyn qadaǵalaý jumysyn ábden júıelegen eken. Sondaı-aq, Jánnat Danyshpaıqyzy júrgizip otyrǵan «Aqtumar» mýzeıiniń de urpaq úshin úıreter úlgisi kóp, berer taǵylymy mol. Orta Azııada ózindik orny bar bilim ordasynyń jumysy jemisti, eńbegi eleýli bolsyn, – dep atap ótti Muhamedjan Tazabek óz sózinde.
Jıyn barysynda belgili aıtysker aqynǵa stýdentter tarapynan qoıylǵan saýaldar kóp boldy. Suraqtardyń deni ata-anany qadirleý, adamdar arasyndaǵy syılastyq, otbasy qundylyqtary men qyz tárbıesi jaıyn qaýzady. Basqosý sońynda Qyzdar Ýnıversıtetiniń Tárbıe jáne áleýmettik jumystar jónindegi departamentiniń mamandary kesh qonaǵyna taǵylymǵa toly áńgimesi úshin rızashylyǵyn bildirip, syı-sııapat kórsetti.
– «Qyz ósse – eldiń kórki». Iıa, shynynda, qyz bala qyzǵaldaq sııaqty, onyń tamyry ata-anasynyń úıinde nár alyp, sabaǵy súıgen jarynyń janynda búr jaryp, gúli ana bolǵan kezinde ashylady. Qazirgi qyz – erteńgi ulttyń anasy. Sondyqtan da, jaqsymyz bolsa, qyzdarǵa bergimiz keledi, ardaqty oıymyz bolsa, aıaýly qyzdarmen bóliskimiz keledi. Búgingi Qazaq memlekettik qyzdar pedagogıkalyq ýnıversıtetinde ótken kezdesýde osy nıetimizdiń júzege asýynyń sáti tústi. «Men sizge bir alma, siz maǵan bir alma berseńiz, eshteńe ózgermeıdi, ekeýmizde de bir-bir almadan bolady. Men sizge bir oı bersem, siz maǵan bir oı berseńiz, ekeýmiz de eki oı bolady» degendeı, bolashaq analardyń aldynda sóz sóılep, qaryndastarymyzǵa aǵalyq aqyl-keńesimizdi aıtyp, rııasyz peıilmen, aqjarqyn kóńilmen berekeli áńgime-dúken quryp, shyn máninde, rýhanı jańǵyrdyq. Lázzatty sátter sekýndtardan, mańyzdy sátter mınýttardan, baqytty sátter saǵattardan turady. Búgingi kezdesý bizdiń de, qulaq qoıyp tyńdaǵan qyzdardyń da esinde qalatyn erekshe shara boldy degen úmittemin. Osyndaı ıgilikti iske múmkindik bergen Qazaq memlekettik qyzdar pedagogıkalyq ınstıtýtynyń basshylyǵyna, ásirese, oqý ornynyń rektory Aldambergenova Gaýhar Tóremuratqyzyna erekshe alǵysymdy bildiremin, – dedi M. Tazabek kezdesý sońynda.
