Elimizdegi eń irgeli mektepterdiń kósh basynda turǵan bilim shańyraǵynda jalpyulttyq ata-analar jınalysy erkin formatta ótti. Muǵalimder men ata-analar arasynda ashyq pikir almasý alańy qalyptasyp, mekteptiń psıholog mamandary ata-analar úshin arnaıy ázirlegen kóńildi trenıngtik baǵdarlamasyn usyndy. Shákirtterdiń jetistikteri saralanyp, bıylǵy oqý jylynda atqarylǵan jumystardyń esebi tyńdaldy. «Rýhanı jańǵyrý» baǵdarlamasynyń mán-mańyzyn kórsetetin arnaıy beınerolıkter kópshilikke kórsetilip, baǵdarlamanyń negizgi baǵyttaryna qatysty baıandamalar oqyldy. Ashylǵanyna nebári tórt jyl bolǵan Nazarbaev Zııatkerlik mektebiniń shákirtteri halyqaralyq deńgeıdegi olımpıadalar men jas ónertapqyshtarǵa arnalǵan álemdik dodalarda joǵary nátıjeden kórinip júr. Bul otbasy men mektep arasyndaǵy úılesimdi baılanystyń jemisi deıdi ustazdar.
– Halyqaralyq otbasy kúninde uıymdastyrylyp otyrǵan jalpyulttyq ata-analar jınalysynyń aýqymy keń. «Rýhanı jańǵyrý» baǵdarlamasyn tárbıe negizinde iske asyrý, qorǵanshylyq keńestiń qyzmetimen tanystyrý, otbasy qundylyqtaryn nasıhattaý jáne otbasy men mekteptiń ózara baılanysyn nyǵaıtý syndy jumystar kún tártibinde talqylandy. Mektep jumysynda ata-analardyń belsendiligi óte joǵary. Oqýshylar tarapynan uıymdastyrylǵan túrli is-sharalarǵa, qaıyrymdylyq aksııalaryna ol kisiler únemi belsene atsalysady. Balasynyń eshteńege alańdamaı jan-jaqty jetilýine jol ashyp otyrǵan ata-analar qaýymynyń qoldaýy bizge úlken kómek, – deıdi mektep dırektorynyń tárbıe isi jónindegi orynbasary Aıgúl Ismaılova.
Atalmysh bilim ordasynan bıylǵy jyly 222 túlek qanat qaqqaly otyr. Olardyń basym bóligi elimizdiń jáne sheteldiń jetekshi ýnıversıtetterinen shaqyrtý alyp ta úlgergen. 11-synyp oqýshysy Aıdana Aıtjanovanyń anasy Jumagúl Tájibekova: «Qyzym bıyl tórtinshi jyl Nazarbaev zııatkerlik mektebinde bilim alyp jatyr. Mekteptiń bilim sapasy óte joǵary. Bul jerde balalar ózderin úıdegideı erkin sezinedi. Qorǵanshylyq keńesiniń múshesi retinde aıtar bolsam, qandaı da bir túsinispeýshilik oryn alyp jatsa ata-analar men mektep ákimshiligi birlese otyryp sheshedi. Máselen ótken jyly aýyr dertke shaldyqqan bir oqýshymyzdyń otasyna búkil ujym men ata-analar bolyp qol ushyn sozdyq» deıdi.
Jınalys barysynda mekteptiń qamqorshylyq keńesiniń jumysy týraly da keńinen aıtyldy. Damyǵan memleketterdiń tájirıbesine úńilsek qamqorshylyq keńesi kóptegen elderde úlken mańyzǵa ıe. Ár bilim mekemelerindegi qamqorshylyq keńes múshelerine júktelgen negizgi mindet bilim berý uıymyna bıýdjettik usynys jasap bilim sapasyna baǵa berýmen ǵana shektelmeı, oqýshylardyń sabaqtan tys ýaqyttardaǵy jan-jaqty damyp jetilýine, túrli úıirmelerge qatysyp ýaqytyn tıimdi paıdalanýyna qoldaý jasaý. Jas zııatkerler mektebinde bul baǵyttaǵy jumystar da júıeli jolǵa qoıylǵan.
«Mektebimizde oqýshylardyń tanym kókjıegin jetildirýge baǵyttalǵan 35 úıirme sabaqtary jumys jasaıdy. Onyń ishinde 12 pándik úıirme, 8-sporttyq, 13-shyǵarmashylyq jáne eki birdeı tehnıkalyq úıirme bar. Nátıjeler sapasy óte joǵary. Qandaı jobalarda bolmasyn ata-analardyń usynys tilekteri mindetti túrde nazarǵa alynady» - deıdi pedagog-uıymdastyrýshy Záýre Toqtamysova.
Jyl qorytyndysyna sáıkes fızıka-matematıka baǵytyndaǵy Nazarbaev Zııatkerlik mektebi elimiz boıynsha jaratylystaný baǵytynda bilim beretin elý mekteptiń ishinde birinshi, gýmanıtarlyq baǵyttaǵy júz mekteptiń ishinde úshinshi orynnan kóringen. Ustazdar qaýymy bul jetistikterdiń ar jaǵynda mekteptiń ǵana emes ata-analardyń da úlken úlesi jatqanyn aıtady. Jıyn sońynda aldaǵy oqý jylynan bastap aıyna bir ret muǵalimder men ata-analar arasynda sporttyq jarys uıymdastyrý, kýrator saǵattaryn ótkizý syndy usynystar aıtyldy.
Arman OKTIаBR,
«Egemen Qazaqstan»
ALMATY
