Osy oraıda Mańǵystaý oblystyq sotynyń tóraǵasy Jaqsylyq Alanov jergilikti ekinshi deńgeıli bank basshylaryn daýlardy sheshýde medıasııany qoldanýdy keńeıtý jumysyna atsalysýǵa shaqyryp keledi.
Mańǵystaý oblystyq sotynyń uıymdastyrýymen osy maqsatta oblystyq sot tóraǵasy Jaqsylyq Alanov bastaǵan sýdıalar qaýymdastyǵy Mańǵystaý oblysy aýmaqtyq Notarıattyq palatasynyń tóraǵasy Rahat Týrebaevamen jáne «Fortebank» AQ-nyń Mańǵystaý oblysy boıynsha fılıalynyń dırektory, ekinshi deńgeıli bankter qaýymdastyǵynyń tóraǵasy Abbat Ýrısbaevpen kezdesti.
Basqosýdyń negizgi máni – qoǵamda sany artyp otyrǵan banktik daýlardy sotqa deıin retteýdiń tetikterin qarastyrýǵa, bankterdiń daýsyz talaptar boıynsha sotqa deıin notarıýsqa júginýin jolǵa qoıý máselelerin talqylaýǵa arnaldy.
Azamattyq ister jónindegi sot alqasynyń tóraǵasy Nursapa Prımashev Mańǵystaý oblysynda azamattyq ister sany sońǵy ýaqytta eki esege kóbeıip ketkenin, sonyń ishinde isterdiń 60 paıyzy banktik kelisim sharttarǵa baılanysty ekenin atap aıtty. Osy oraıda daý máni joq isterdiń de sot arqyly sheshiletini statıstıkany ulǵaıtyp otyrǵanyn tilge tıek etti.
«Notarıat týraly» QR Zańy talabyna saı notarıýsterge daýdy sotqa deıin retteý quqyǵy, onyń ishinde atqarýshylyq jazba jasaqtaý quqyǵy berilgen. Notarıýs salasynda uzaq jylǵy jumys tájirıbesi bar Rahat Týrebaeva daýsyz talaptar boıynsha atqarýshylyq jazba arqyly daýdy sheshýdiń tez ári utymdy ekenin atap aıtty. О́z kezeginde sóz alǵan Abbat Ýrısbaev: «Azamattardyń quqyqtyq-qarjylyq saýattylyǵy jyldan jylǵa artyp keledi. Sonyń arqasynda banktik kelisim sharttar boıynsha sotqa júginýshi azamattar qatary artýda. Qazirgi jaǵdaıda sottarmen birge ekinshi deńgeıli bankter de kóptegen shyǵyn men júktemege tap bolýda. Osy oraıda oblystyq sot tóraǵasy Jaqsylyq Rzabekulynyń birqatar banktik daýlardy sotqa jetkizbeı, medıasııa arqyly sheshý týraly tıimdi usynysyn qýana qoldaımyz», - dedi.
Qatysýshylar jıyn sońynda daýlardy sotqa deıingi jáne sottan tys retteý ınstıtýtyn qoldaný aıasyn keńeıtip, qoǵamda daýdy azaıtý maqsatynda, halyqaralyq qaýymdastyqta básekege qabilettilik kórsetkishin jaqsartý, zańnyń ádil tóreligin, ashyqtyq pen jarııalylyqty qamtamasyz etý negizinde óz ustanymdaryn saqtaı otyryp, ózara yntymaqtastyq jónindegi úshjaqty memorandýmǵa qol qoıdy. Qatysýshylar memorandým aıasynda tıimdi jumys júrgizýge jol ashqandaryn, aldaǵy ýaqytta klıenttermen kóp jumys jasaıtyn ózge de ekinshi deńgeıli bankterge úlgi kórsetetinderin aıtty.
Atalǵan memorandým aıasynda azamattyq daýlardyń sany azaıyp, sottardyń júktemesi tómender bolsa, daýlasýshy taraptar sotqa júginbesten buryn, bitimgerlik kelisimmen óz daýlaryn sheship jatsa, yntymaqty jumystyń basty jemisi sol bolmaq.
Is-shara barysynda azamattyq jáne qylmystyq-quqyqtyq daýlardy sheshýge bitimgerlik rásimderin belsendi engizýge, daýlardy balamaly sheshý júıesin nyǵaıtýǵa, sottan tys medıasııa ınstıtýtyn jetildirýge baılanysty oń pikirler aıtyldy, jańa quqyqtyq ınstıtýtty odan ári damytý jóninde tıimdi usynystar berildi.
Bekitilgen kelisim yntymaqtastyq aıasynda týyndaıtyn máselelerdi birlesip sheshýge, sýdıalardyń asa kúrdeli isterdi zerdeleýine, sottardyń kúrdeli emes ister boıynsha júktemesin tómendetýge septigin tıgizedi dep kútilýde.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
