Is-sharaǵa Ázerbaıjan Prezıdentiniń qoǵamdyq-saıası máseleler boıynsha kómekshisi Álı Gasanov, Ázerbaıjan Parlamentiniń depýtaty, «Ázerbaıjan-Qazaqstan» parlamentaralyq dostyq tobynyń tóraǵasy Ádil Álıev, Ázerbaıjan Parlamentiniń depýtaty, «Ázerbaıjan-Qazaqstan» parlamentaralyq dostyq tobynyń múshesi Nızamı Djafarov bastaǵan bir top delegatpen birge, aıtýly jınaqtyń qazaq tilinde jaryq kórýine atsalysqan elimizdiń belgili tulǵalary, zııaly qaýym ókilderi qatysty. Olardyń arasynda Qazaqstan Respýblıkasy Prezıdenti Keńsesiniń bastyǵy, jańa basylym redaksııa alqasynyń jetekshisi Mahmut Qasymbekov, Qazaqstan Respýblıkasynyń Tuńǵysh Prezıdenti – Elbasy qorynyń atqarýshy dırektory Qanat Jumabaev, Elbasy kitaphanasy dırektorynyń orynbasary Ámirhan Rahymjanov, Halyqaralyq Túrki akademııasynyń prezıdenti Darhan Qydyráli, L.N.Gýmılev atyndaǵy EUÝ rektory Erlan Sydyqov jáne taǵy basqa el azamattary bar.
«О́tken ǵasyrdyń toqsanynshy jyldarynda burynǵy Keńes odaǵynyń quramynda bolǵan barlyq respýblıka egemendikke qol jetkizgende, bul almaǵaıyp kezeńdi ár memleket basynan ártúrli jaǵdaıda ótkerdi. Sondaı qıyn-qystaý kezeńderde de Qazaqstan men Ázerbaıjan memleketi dostyq, baýyrlastyq qarym-qatynasyna qylaý túsirmeı, kerisinshe, bir-birine demeý boldy. Onyń aıqyn aıǵaǵy Elbasymyz Nursultan Nazarbaev pen Geıdar Álıevtiń arasyndaǵy uly dostyq, rýhanı jyly qarym-qatynas. Geıdar Álıev tek Ázerbaıjan eli úshin ǵana emes, kúlli túrki álemine ortaq qaıratker tulǵa. Onyń kóregen saıasatynyń arqasynda qazirgi gúldengen, demokratııalyq Ázerbaıjan memleketiniń negizi qalandy. Geıdar Álirzaulynyń eń birinshi aldyna qoıǵan mindeti – Ázerbaıjan halqynyń, memleketiniń táýelsizdigin tuǵyrly etý bolatyn. Ol armanyna sózsiz jetti. О́z halqyn damýdyń dańǵyl jolyna salyp ketti. Geıdar Álıev – eline jol ashqan naǵyz qaıratker tulǵa» – dep jańa kitaptyń jaryqqa shyǵýymen barsha oqyrmandy quttyqtaǵan Qazaqstan Respýblıkasy Prezıdenti Keńsesiniń bastyǵy, jańa basylym redaksııa alqasynyń jetekshisi Mahmut Qasymbekov kórnekti tulǵanyń azamattyq, qaıratkerlik jolyn baıan etti.
Qazaq oqyrmanyna jol tartqan aıtýly ǵumyrnamalyq eńbekke Ázerbaıjannyń burynǵy prezıdenti, kórnekti memleket qaıratkeri Geıdar Álıevpen úzeńgiles el basshylarynyń, shet memleketter kóshbasshylarynyń, Ázerbaıjannyń qazirgi basshylyǵy men saıasat, ekonomıka jáne bıznes salasyndaǵy tulǵalarynyń iri saıasatker hám álemdik deńgeıdegi azamat jaıyndaǵy estelikteri toptastyrylǵan. Al basylymnyń alǵysózin Geıdar Álıevpen tamyry tereń dostyqta bolǵan Qazaqstan Respýblıkasynyń Prezıdenti Nursultan Nazarbaev jazdy. «Bul rette, Geıdar Álirzaulynyń 95 jyldyǵyna oraı basylyp shyqqan ǵumyrnamalyq eńbektiń alǵash ret qazaq tiline aýdarylyp, qalyń oqyrmanǵa usynylýy – Qazaqstan men Ázerbaıjan arasyn jaqyndata túsetin aıtýly oqıǵa ekenin atap ótkim keledi» delingen kitaptyń kirispe sózinde.
Rasymen de, Ázerbaıjan eliniń aıaýly perzenti Geıdar Álıevtiń 95 jyldyǵyna oraı qazaq tilinde jaryq kórgen kitaptyń Elbasy Nursultan Nazarbaevtyń alǵysózimen shyǵýy ulylar úndestiginiń jarqyn kórinisi bolsa kerek. Muny kitaptyń tusaýkeser rásimine arnaıy qatysqan mártebeli meıman, Ázerbaıjan Prezıdentiniń qoǵamdyq-saıası máseleler boıynsha kómekshisi Álı Gasanov óz sózimen salmaqty sabaqtady.
«Túbi bir túrki jurtymyz» desek, búgin eki elge birdeı ortaq mańyzdy kún. Olaı deıtinimiz – Nursultan Nazarbaevtyń bizdiń elimizge yqylasy aıryqsha ekenin bilemiz. Oǵan eki el prezıdentiniń arasyndaǵy rýhanı dostyq hám aǵaly-inilideı týysqandyq, baýyrlastyq qarym-qatynastary kýá. Osy oraıda Ázerbaıjan halqynyń maqtanyshy Geıdar Álıevtiń 95 jyldyq mereıtoıy qazaq jerinde osyndaı ıgi sharadan bastaý alyp, qazaq tilindegi jańa kitaptyń tusaýkeserimen jalǵasýy – baýyrlas qos memleket arasyndaǵy ejelden kele jatqan tini úzilmegen úlken dostyqtyń belgisindeı. Búgingi jaryq kórgen Geıdar Álıev jaıyndaǵy ǵumyrnamalyq eńbekke Nursultan Ábishulynyń alǵysóz jazyp, óziniń júrekjardy tilegin bildirip hám saıası baǵasyn berýi biz úshin úlken mártebe. Ázerbaıjan men Qazaqstan ortaq qundylyqtar men qyzyǵýshylyq jolynda áli de jemisti eńbek ete beredi dep senemin» – dep túıindedi sózin Álı Gasanov.
«О́z qolymmen qurǵan dúnıelerdiń bári men úshin qymbat, ...bári de mańyzdy. Alaıda júregime bárinen buryn halqym men týǵan jerim ystyq» – dep artynan óshpes sóz qaldyryp, elin sheksiz súıip ótken dańqty tulǵanyń shyn máninde Ázerbaıjan halqynyń kemel keleshegi úshin atqarǵan eńbegi eresen. Geıdar degen esiminiń ózi maǵynalyq turǵyda kóshbasshy degen uǵymmen úndesetini de tegin bolmasa kerek. Qaıratker tulǵanyń júrip ótken joly men árbir jasampaz áreketi búginde zaıyrly memleketke aınalǵan ázerbaıjan halqynyń táýelsizdigin tuǵyrly, erkindigin eńseli etýge qyzmet etip keledi. Al tusaýy kesilip, oqyrmanyna jol tartqan aıtýly eńbek Qazaqstan men Ázerbaıjan memleketteriniń uzaq jylǵy irgesi úzilmegen berik dostyǵynyń aıǵaǵyndaı.
Nazerke JUMABAI,
«Egemen Qazaqstan»
