Eki el arasyndaǵy saıası-dıplomatııalyq tyǵyz baılanysty aıtpaǵan kúnniń ózinde baýyrlas halyqtardy biriktire túsetin ortaq qundylyqtar men rýhanı-mádenı sabaqtastyqtyń tamyry tereńde jatyr. Sondyqtan bolar, qos memlekettiń dostyǵy men birligin bekemdeıtin san saladaǵy alys-beris pen barys-kelister legi tolastaǵan emes. Qos taraptyń ádebıeti men mádenıetin bir arnada toǵystyrǵan bul basqosý Ázerbaıjan Demokratııalyq Respýblıkasynyń 100 jyldyǵyna jáne Ázerbaıjan halqynyń ult kóshbasshysy Geıdar Álıevtiń 95 jyldyǵyna oraı uıymdastyrylyp otyr.
Is-sharaǵa Ázerbaıjan Respýblıkasy Prezıdentiniń qoǵamdyq-saıası máseleler jónindegi kómekshisi Alı Gasanov, Ázerbaıjan Respýblıkasynyń Qazaqstandaǵy tótenshe jáne ókiletti elshisi Rashad Mammadov, Halyqaralyq Túrki akademııasynyń prezıdenti Darhan Qydyráli, Ál-Farabı atyndaǵy Qazaq Ulttyq Ýnıversıtetiniń rektory Ǵalym Mutanov, Ázerbaıjan Respýblıkasy Mıllı Májilisiniń Ázerbaıjan – Qazaqstan parlament aralyq baılanystar jónindegi jumys tobynyń basshysy Adıl Alıev, Ázerbaıjannyń televıdenıe jáne radıo Ulttyq keńesi tóraǵasynyń orynbasary ári «Kaspı» gazetiniń bas redaktory Sona Valıeva, Halyqaralyq «Túrksoı» uıymynyń Bas hatshysy Dúısen Qaseınov bastaǵan zııaly qaýym ókilderi qatysty.
Shara sheńberinde ótken tanymdyq konferensııada Ázerbaıjannyń tuńǵysh prezıdenti Geıdar Álıevtiń óz eline ǵana emes, túbi bir túrki halyqtarynyń tutastyǵy men birligine sińirgen ólsheýsiz úlesi týraly keńinen aıtyldy. Kópshilik qaýymnyń nazaryna Kóshbasshynyń ómiri men qaıratkerlik jolyn tanytatyn arnaıy fılm usynylyp, Elbasy Nursultan Nazarbaevtyń alǵysózimen qazaq tiline aýdarylǵan Geıdar Álıevtiń «Eline jol ashqan» atty eńbegi tanystyryldy.
Ulttyq ýnıversıtette jańadan ashylǵan Ázerbaıjannyń tarıhy men mádenıeti ortalyǵynyń tusaýyn kesken Alı Gasanov týystas túrki halyqtary arasyndaǵy sabaqtastyqty qaıta jańǵyrtqan bul joba keleshek urpaq úshin úlken ónege ekenin aıtyp, uıymdastyrýshylarǵa alǵysyn bildirdi. Sý jańa ortalyqtan Ázerbaıjan eliniń ótkeni men búginine, tarıhy men mádenıetine qatysty kez-kelgen aqparatty taba alasyz. Geıdar Álıevtiń kóptegen qundy qujattary da dál osynda saqtalǵan. Oǵan qosa ortalyq qory Halyqaralyq Túrki akademııasy syıǵa tartqan 100 jańa kitappen tolyqty. Aldaǵy ýaqytta bul ortalyq túrkitaný ǵylymynyń órisin keńeıtip, túrki tildes halyqtardyń tarıhy men etnografııasyn, tili men rýhanı murasyn zerttep-zerdeleıtin keleli oılar alańyna aınalmaq.
Aıtýly shara sóz qudireti arqyly ár zamannyń tynysyn óz únine saı jyrlaǵan Ázerbaıjan ultynyń uly aqyny, dramatýrg Hýseın Javıdtiń 135 jyldyǵyna arnalǵan konferensııaǵa ulasty. Eki halyqtyń rýhanı baılanysyn jaqyndata túsken jıynda aqynnyń parasat bıiginen kóringen jaýhar shyǵarmalary taldanyp, onyń óleńi men álemi týraly oramdy oılar ortaǵa tastaldy. Túrikshildik ıdeıasyn álemge taratýdy búkil jan dúnıesimen qabyldaǵan aqynnyń ómirine qatysty tyń derekter aıtyldy. Tutas túuran topyraǵyna ortaq tolaǵaı tulǵanyń eńbekterin taldap, oǵan baǵa berý áli de bolashaqtaǵy túrkitaný ǵylymynyń alda turǵan maqsaty degen Ǵalym Mutanov Javıd jyrlaryn qazaq tiline aýdarý isine Ulttyq ýnıversıtet ujymy qoldaý tanytatynyn jetkizdi.
– Ǵasyrlar qoınaýynda jatqan asyl muralardy búgingi urpaqqa jetkizý bárimiz úshin abyroıly is. Nursultan Nazarbaevtyń bul baǵytta atqaryp otyrǵan syndarly saıasaty barsha túrki halyqtaryna úlgi-ónege bola alady. Búgingi shara osynyń bir kórinisi, – deıdi Ázerbaıjan Respýblıkasynyń Qazaqstandaǵy tótenshe jáne ókiletti elshisi Rashad Mammadov.
Arman OKTIаBR,
«Egemen Qazaqstan»
Sýretterdi túsirgen Marat JÚNISBEKOV
ALMATY
