Bul is-sharany uıymdastyrýdaǵy maqsat – óskeleń urpaqty azamattyq, ar-namys jáne patrıottyq rýhta tárbıeleý, sondaı-aq qoǵamda batyr balalardyń erlik isterin baıandaýǵa múmkindik jasap, kishkentaı batyrlarǵa alǵys bildirý.
Marapattaý rásimine elimizdiń ár túkpirinen 20 batyr bala shaqyrylǵan bolatyn. Olar erlik áreketteri úshin eshqandaı marapat almaǵan balalar.
– Men sizderge úlken qurmet kórsete otyryp, Astana qalasyna qosh keldińizder deımin. Elimizdiń júregi – Astana bıyl óziniń 20 jyldyq mereıtoıyn atap ótedi. Memleket basshysy Nursultan Nazarbaevtyń kóregen saıasatynyń arqasynda búginde Astana táýelsiz Qazaqstannyń maqtanyshyna aınaldy. Astana tek qana elimizdiń qoǵamdyq-saıası, ekonomıkalyq jáne mádenı ómirdiń ortalyǵy emes, búkil Eýrazııa keńistiginiń júregi sanalady, – dedi Qalmuhanbet Qasymov marapattaý rásiminde.
– Elordanyń týǵan kúni qarsańynda Astanaǵa elimizdiń ár túkpirinen jasóspirim batyrlar keldi. Bul balalardyń barlyǵy da qysyltaıań shaqta erjúrektik kórsetip, adam ómirine arasha bolǵandar. Sizder qazirdiń ózinde kópke úlgi tutatyn jandarsyzdar. Osy oraıda sizderdiń ata-analaryńyzǵa, muǵalimderińizge jáne ózderińdi tárbıelep júrgen tálimgerlerińizge zor alǵysymdy bildiremin. Elimizde ózderińiz sııaqty batyr balalar barda aldyńǵy aǵa býyn Qazaqstannyń bolashaǵyna senimmen qaraıdy. Biz sizderdi jáne sizderdiń erlikterińizdi maqtan tutamyz, – dep atap ótti mınıstr.
Qalmuhanbet Qasymov barlyq balalarǵa densaýlyq, tabys tilep, bolashaqta da osyndaı batyr, qyraǵy, rýhy kúshti, erjúrek qalyptaryn saqtap, bıikterden kórine berýlerine aǵalyq tilektestigin jetkizdi. Budan soń Q.Qasymov batyr balalardy óz qolymen «Tótenshe jaǵdaıdaǵy erligi úshin» medaldarymen marapattap, baǵalyq syılyqtar usyndy.
Saltanatty is-shara barysynda balalar qurmetti qaraýyldyń ónerlerin, áskerı orkestrdiń oryndaýynda patrıottyq jáne áskerı kompozısııalardy tamashalady. Oqýshylar saraıyna jáne Astananyń kórikti jerlerine saıahat jasady.
