Sýrette: júldegerler salǵan portretter
Bıyl osy baıqaýǵa oblys qalalary men aýdandarynan jastar 50-den asa jumystaryn usyndy. Baıqaý shartyna oraı, olar ózderiniń jaqyn týǵan-týystarynyń, balalarynyń, dostarynyń, ata-analarynyń, qysqasy ómirde bar adamdardyń beınesin salýy tıis. Iýrıı Novoselovtyń baıqaýdy nege tek qana portret janrynda ótkizýiniń syry da bar.
– Portret eń qıyn, kúrdeli janrdyń biri. Jaqyndarynyń portretin salý ońaı kóringenimen, onyń qıyndyǵy boıaýlar úılesimdiligin, keıipkerdiń ishki jáne syrtqy uqsastyǵyn jasaý, portretke psıhologııalyq jáne rýhanı sıpat berip, modeldiń negizgi ıdeıasyn tabý, kisiniń sýrettegi ózine uqsaıtyn sátin beıneleýde bolsa kerek. Portret óneri basynan aıaǵyna deıin shyǵarmashylyq jumysty talap etedi, – deıdi Iýrıı Dmıtrıevıch.
Jyl saıyn baıqaýǵa túsken jumystardy Qostanaıdaǵy sýretshiler saralaıdy. Bıyl qazylar jastarǵa talapty kúsheıtińkirepti. Olar eń jaqsy degen jumysqa birinshi emes, ekinshi oryn berdi. Ony Qostanaı qurylys kolledjiniń stýdenti Roza Ybyraeva aldy. Al úshinshi orynǵa L.Rýsın atyndaǵy jekemenshik kórkem sýret mektebiniń oqýshysy Arına Vakerovanyń jumysy laıyq dep tabyldy. Oblystyq bolǵanymen baıqaýdyń júldesine taǵaıyndalǵan syılyq kóp emes, 10-15 myń teńge ǵana.
– Bul syılyqty men ózimniń zeınetaqymnan bólemin. Jastar úshin bul baıqaýdyń syılyq kólemi emes, eń bastysy oǵan qatysýy, sol arqyly shyǵarmashylyǵyn shyńdaýy, izdenisi, úırenýi mańyzdy bolýy tıis. Jastardy ónerge baýlý, shyńdaý úshin memleketten úıip-tógip qarjy bólinedi. Ol kóbinese naýqandyq sıpat alady. Júldesi az bolsa da, qazir jastar osy baıqaýǵa jappaı qatysyp keledi. Úsh jyldyń ishinde baıqaýǵa túsken dúnıelerden nazar aýdartatyn qanshama jumysty baıqadym. О́sý bar degen sóz. Meniń maqsatym osy ǵana bolatyn, – deıdi Iýrıı Dmıtrıevıch.
Baıqaýdyń qorytyndy kórmesi oblystyq Kórkemsýret galereıasynda bir aı turady. Qolyna qylqalam ustaǵan talapkerlerdiń talpynysyn qyzyqtaýshylar da kóp.
Názıra JÁRIMBET,
«Egemen Qazaqstan»
QOSTANAI
