Paneldik sessııaǵa memlekettik organdar men úkimettik emes uıymdardyń ókilderi, saıasattanýshylar, taıaý jáne alys shet elderdiń sarapshylary qatysty.
Shara qatysýshylary aldynda baıandama jasaý barysynda QR din isteri jáne azamattyq qoǵam mınıstri Darhan Káletaev Qazaqstanda azamattyq qoǵamdy odan ári damytý boıynsha birqatar ózekti máselelerdi qozǵady.
«Qazaqstan álemdik úrdistermen bir baǵytta júrip jatyr. Memleket basshysy ǵalamdyq damýdyń basty bes megatrendin atap ótti. Olardyń qatarynda adam qyzmetiniń barlyq salalaryn sıfrlandyrý, energetıkalyq revolıýsııa, jer sharyndaǵy turǵyndar sanynyń jyldam ósýi, kenttený qarqyny men sıpatynyń jáne jahandyq eńbek naryǵynyń ózgerýi bar. Sondyqtan da AEF-2018 transformasııalaý aıasynda alǵash ret azamattyq qoǵamnyń bolashaǵy máselesin qarastyrýǵa sheshim qabyldadyq. Biz jańa azamattyq belsendi árekettiń adamdardyń jáne memlekettiń kúndelikti ómirine qalaı áser etetinin talqylaý úshin bedeldi sarapshylardy shaqyrdyq», — dedi Darhan Káletaev.
D. Káletaev áleýmettik jelilerdiń halyqtyń jappaı sana-sezimine yqpaly týraly óziniń baqylaýymen bólisti, sondaı-aq azamattyq qoǵamnyń dástúrli ınstıtýttary halyqtyń pikirin bildirý úshin jańa jelilik ınstıtýtarmen básekege túsetinine toqtaldy. Onyń aıtýynsha, áleýmettik jeliler men ınternet bizge azamattyq belsendiliktiń taǵy bir túrin ashty — vırtýaldy belsendilik, munda kez kelgen adam memlekettik bastamalardy, qoǵamdyq máselelerdi talqylaýǵa qatysa alady jáne olardy sheshý boıynsha syndarly usynystar jasaı alady.
Mınıstr azamattyq qoǵamnyń jańa transformasııanyń bastaýshysy bolýy tıis ekenin atap ótti, bul úshin qajetti bilim alyp, jańa daǵdylar men quzyretterdi damytyp, qarym-qatynas pen kommýnıkasııa mádenıetin jetildirý qajet.
ÚEU damýynyń zamanaýı úrdisteri, áleýmettik kásipkerlik jáne azamattyq belsendilik formalary týraly tanymal sarapshylar aıtyp beredi, atap aıtqanda «Talap» qoldanbaly zertteýler ortalyǵynyń basshysy Rahym Oshaqbaev, «Qoǵamdyq máselelerdi taldaý ortalyǵy» qoǵamdyq qorynyń dırektory Merýert Mahmutova, «Ekonomıka joǵary mektebi» UZÝ Azamattyq qoǵamdy jáne kommersııalyq emes sektordy zertteý ortalyǵynyń dırektory Irına Mersııanova (Máskeý, RF), AlmaU ýnıversıtetiniń rektory Gúlmıra Qorǵanbaeva, saıasattanýshy Saıasat Nurbek.
Paneldik sessııa aıasynda azamattyq qoǵam salasynda iske asyrylǵan ınnovasııalyq jobalar men ozyq tájirıbelerge arnalǵan ınteraktıvti kórme ótkizildi.
